Ҳавопаймои ҳарбии боркашонии Артиши мардумии озодихоҳи Чин ба Душанбе кумаки башардӯстона овард.
“Кумак барои табибони ҳарбии Вазорати мудофиаи Тоҷикистон пешбинӣ шудааст”, – гуфт ба “Азия-Плюс” сардори маркази матбуоти вазорат Ориф Нозимиён.
Табибони ҳарбӣ аз ҳамтоёни чинии худ ба маблағи умумии 2 миллион юан 13 номгӯйи таҷҳизоти тиббӣ, аз ҷумла, дастгоҳҳои нафасдиҳии сунъӣ гирифтанд.
“Табибони ҳарбие, ки ҳамроҳи ин кумак омаданд, кори муассири дастгоҳҳои ба Душанбе овардашударо барои мубориза бо СОVID-19 таъкид карданд”, – афзуд Нозимиён.
Ёдрас мекунем, ки қаблан бародаршаҳрҳои Душанбе – Синдао ва Сямини Чин ба Тоҷикистон кумак карданд. 10-уми май дар дидбонгоҳи назоратии “Қулма-Қарасу” 17 дастгоҳи нафасдиҳии сунъӣ (ИВЛ), беш аз 48 ҳазор ниқоби муҳофизатии тиббӣ, қариб 397 ҳазор ниқоби тиббии яккарата, 47 ҳазор ниқоби тиббии ҷарроҳӣ, 11 ҳазору 750 маҷмӯи либоси муҳофизатии тиббӣ, 20 ҳазору 600 ҷуфт дастпӯшак, 11 ҳазор айнаки муҳофизатӣ, 900 ҳароратсанҷ ва 5 ҳазор экран-ниқоби муҳофизатӣ ба Тоҷикистон супорида шуд. Арзиши кумак 479,6 ҳазор доллар ва зиёда аз 6,5 тоннаро ташкил дод.
Қобили зикр аст, ки ҳукумати Чин низ ба Тоҷикистон кумак карда, он қисман ба ҷумҳурӣ интиқол дода мешавад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
