Президенти Тоҷикистон Эмомалӣ Раҳмон дар маросими оғози сохтмони нерӯгоҳи барқи обии «Себзор» дар Вилояти Мухтори Кӯҳистони Бадахшон иштирок мекунад.
Вазири энергетика ва захираҳои оби Тоҷикистон Усмоналӣ Усмонзода зимни нишасти хабарии рӯзи 22 июл дар ин робита изҳор намуд, ки сафар президенти мамлакат ба ВМКБ рӯзҳои наздик дар назар аст.
Усмонзода таъкид дошт, ки нерӯгоҳи барқи обии «Себзор» бо мақсади таъмини пурраи вилоят бо нерӯи барқ ва ҳамчунин содироти он ба минтақаҳои ҳамсояи Афғонистон бунёд мегардад.
Ёдрас мекунем, ки
оғози сохтмони нерӯгоҳи «Себзор» бо иштироки Эмомалӣ Раҳмон
тирамоҳи соли гузашта ба нақша гирифта шуда буд, вале он замон сафари президент ба Бадахшон ба таъхир афтод.
Нерӯгоҳи барқии нав бо иқтидори лоиҳавии 12 МВт дар ҷамоати Мирсаид Миршакар, дар мавзеи Себзор, воқеъ дар 15 километрии шаҳри Хоруғ сохта мешавад.
Қобили зикр аст, ки бо мавриди истифода қарор гирифтани нерӯгоҳи оби барқии «Себзор» ба таъмини иншооти нави сохташаванда, ҳамчунин сохтмони Донишгоҳи Осиёи Марказӣ бо нерӯи барқ ва таъсиси корхонаҳои нави истеҳсолӣ имкон фароҳам оварда мешавад.
