Интизор меравад, ки нимаи моҳи июни соли равон додгоҳе дар шаҳри Маскав ба баррасии парвандаи ҷиноятӣ алайҳи чаҳор муттаҳами асосӣ дар ҳамла ба толори консертии “Крокуси сити Ҳол” оғоз кунад. Дар ин бора хабаргузории “ТАСС” бо такя ба манобеи худ дар мақомоти ҳифзи ҳуқуқи Русия хабар додааст.
Ба иттилои манбаъ, оид ба ҳамлаи террористӣ дар парванда далелҳои зиёд мавҷуд аст. Ҳоло шиносии муттаҳамон ва ҳимоятгарони онҳо бо ин далелҳо идома дорад.
“Пас аз анҷоми ин тартиб, мавод барои тасдиқи айбнома ба додситонӣ ва сипас ба додгоҳ фиристода мешавад”, – гуфтааст манбаъи “ТАСС”.
Ёдовар мешавем, ки моҳи март Додгоҳи шаҳри Маскав ҳабси чаҳор нафари эҳтимолии амали террористӣ дар “Крокус Сити Холл”-ро тамдид кард. Мӯҳлати боздошти Далерҷон Мирзоев, Саидакрам Раҷабализода, Фариддун Шамсиддин ва Муҳаммадсобир Файзов то 22 май дароз карда шуд.
Ин бори панҷум аст, ки додгоҳ ҳабсии пешакии гумонбарони аслии ҳамла ба “Крокус Сити Ҳолл”-ро тамдид мекунад. Қаблан, рӯзи 19-уми феврали соли равон баъди 3 маротибаи тамдиди муҳлати боздошт, додгоҳ бори дигар муҳлати ҳабси онҳоро як моҳ -то 24-уми март дароз карда буд.
Ёдрас мешавем, ки ҳамлаи террористӣ дар “Крокус Сити Ҳолл” рӯзи 22-юми марти соли 2024 рух дод. Бар асари он 146 нафар кушта ва 551 каси дигар захмӣ шудаанд.
Моҳи майи соли 2024 ХБФ-и Русия аз боздошти 20 нафар, аз ҷумла, гумонбарони ин ҳодиса ва ҳамдастони онҳо хабар дод. Баъдан дар моҳи октябр мақомоти рус эълом карданд, ки шохаи “ДОИШ-Хуросон” дар ин ҳамла даст доштааст.
Дертар Александр Бастрикин, раҳбари Кумитаи тафтишоти Русия эълом кард, ки дар иртибот ба ҳамлаи террористӣ ба "Крокус"-и Маскав 27 нафар гумонбар дониста мешаванд.
Шеваи боздошту ба ҳабс гирифтани гумонбарони амали террористиро ҳомиёни ҳуқуқи инсон интиқод карданд. Чаҳор гумонбарии аслии боздоштшуда дар додгоҳ бо рӯи кафидаву осори зарбу лат намудор шуданд.
Наздикону пайвандон ва ҳамсояву омӯзгорони ҳамаи гумонбарон дар суҳбат бо “Азия-Плюс” гуфтанд, бовар надоранд, ки Муҳаммадсобир Файзов, Далерҷон Мирзоев, Саидакрам Раҷабализода ва Фариддуни Шамсиддин ҳамлаи террористӣ анҷом дода, даҳҳо нафарро кушта бошад.
Баъди ҳамлаи террористӣ фишор болои муҳоҷирони тоҷик аз ҷониби мақомоти Русия ва бегонаситезӣ аз сӯйи афроди алоҳида бештар шуд. Ҷониби Тоҷикистон дар пайи фишорҳои ахир болои шаҳрвандонаш дар Русия чандин бор изҳори нигаронӣ кард ва ба сафири ин кишвар дар Тоҷикистон нотаи эътирозӣ супорид.
Дар бораи ҷузъиёти ҳодиса ва бо гузашти як сол чӣ тағйирот дар он сурат гирифт, дар ин пайванд хонед.
