Бар асари зарбаи Нерӯҳои ҳарбии кайҳонии Русия ба мавқеъҳои гурӯҳи ҷангиёни “Давлати исломӣ” дар наздикии Дейр-эз-Зори Сурия, собиқ фармондеҳи Дастаи таъиноти махсуси милиса (ОМОН)-и ВКД Тоҷикистон Гулмурод Ҳалимов кушта шуд.
Хабаргузории РИА Новости бо истинод ба Вазорати мудофиаи Русия менависад, дар натиҷаи ин зарба дар маҷмӯъ наздики 40 ҷангиёни гурӯҳ ва якчанд нафар фармондеҳон кушта шудаанд.
Гуфта мешавад, миёни нобудшудагон “вазири ҷанг”-и Давлати исломӣ, собиқ фармондеҳи ОМОН-и Тоҷикистон полковник Гулмурод Ҳалимов низ ҳузур дорад, ки ҳамчун Ал-Тоҷикӣ низ маълум аст. Ғайр аз ин, “амири Дейр-уз-зор” Абӯ Муҳаммад аш-Шимолӣ низ нобуд шудааст, ки чанде аз хадамоти махсуси кишварҳои аврупоӣ ӯро созмондеҳи амалҳои террористӣ дар Париж (13 ноябри соли 2015) мешуморанд.
Гулмурод Ҳалимов моҳи сентябри соли 2016 “вазири ҷанг”-и нави гурӯҳи террористӣ шуда, дар ин вазифа Тархан Батирашвилӣ, мулаққаб ба Абӯ Умар аш-Шишониро иваз кард.
Ёдрас мекунем, ки фармондеҳи ОМОН ВКД Тоҷикистон полковник Гулмурод Ҳалимови 40-сола ахири моҳи апрели соли 2015 бедарак шуд. Ӯ дар ҷойи кор пайдо нашуда, макони будубошаш ҳам ба касе маълум набуд. Расо баъди як моҳ полковник аз худ дарак дод.
Дар шабака навори видеоии 12-дақиқаинаи муроҷиати Ҳалимов бо забони русӣ интишор шуд. Дар ин навор ӯ ҳикоят кард, ки ба нишони эътироз алайҳи тарзу усулҳои кор дар ВКД ба сафи «Давлати исломӣ» пайвастааст. Ҳукуматдорон таъҷилан Ҳалимовро ба хиёнат ба давлат муттаҳам карда, тариқи Интерпол мавриди ҷустуҷӯ эълон карданд.
Прокуратураи генералии Тоҷикистон нисбати Гулмурод Ҳалимов мувофиқи се моддаи Кодекси ҷиноии ҶТ – 305 (Хиёнат ба давлат), 187, қ. 2 (Иштирок дар гурӯҳи ҷиноятпеша) ва 401 (Иштирок дар амалиёти ҷангӣ дар хориҷи кишвар) парвандаи ҷиноӣ боз намуд.
Санаи 30 августи соли 2016 ҳукуматдорони ИМА барои маълумот доир ба макони будубоши Ҳалимов 3 млн. доллар мукофотпулӣ эълон карданд. Департаменти давлатӣ ӯро яке аз пешвоёни калидии “Давлати исломӣ” номид.
Бори авввал нест…
Дар бораи марги Гулмурод Ҳалимов қаблан низ хабарҳо мунташир шуда буданд. Рӯзи 15 апрели соли равон маҷаллаи «Таймс» дар бораи кушта шудани собиқ фармондеҳи Дастаи таъиноти махсуси милиса (ОМОН)-и ВКД Тоҷикистон Гулмурод Ҳалимов маълумот дод, вале маълумоти тасдиқи марги ӯро ВКД Тоҷикистон то ҳол нагирифтааст.
Дар ҳамин ҳол, моҳи июни соли равон Суди шаҳри Душанбе Беҳрӯз Ҳалимови 18-сола, писари Гулмурод Ҳалимовро ба 10 соли зиндони низомаш шадид маҳкум кард. Ӯ дар содир намудани ҷиноятҳо мутобиқи ду моддаи Кодекси ҷиноятии Тоҷикистон – 32 (тайёрӣ ба ҷиноят ва суиқасд ба ҷиноят) ва 401 (зархаридӣ) гунаҳкор дониста шуд.
Дар суд зикр карданд, ки Беҳрӯз Ҳалимов тавассути шабакаҳои иҷтимоӣ бо шиносҳои падараш дар тамос шуда, бо мусоидати онҳо барои пайвастан ба сафҳои ҷангиёни Давлати исломӣ ба Ироқ ё Сурия рафтанӣ будааст.
