Имрӯз дар палатаи поёнии парлумони ҷумҳурӣ масъалаи тасдиқи Созишнома миёни Тоҷикистон ва ташкилоти амнияти техникии Созмони аҳдномаи Атлантикаи Шимолӣ (НАТО) дар бораи амалисозии масоили амният ва идоракунии захираҳои аслиҳа дар ҶТ такроран баррасӣ мешавад.
Тавре ба ОИ «Азия-Плюс» котиби матбуотии палатаи поёнии парлумони кишвар Муҳаммадато Султонов хабар дод, чанде қабл дар ҷаласаи Шӯрои Маҷлиси намояндагон таҳти раёсати раиси палатаи поёнии парлумон Шукурҷон Зуҳуров чунин тасмим гирифта шудааст.
Ёдрас мекунем, ки масъалаи макзкур санаи 26-уми декабр дар ҷаласаи навбатии палатаи поёнии парлумони кишвар мавриди баррасӣ қарор гирифта буд.
Зимни шарҳи он ба вакилон муовини вазири мудофиаи Тоҷикистон Суҳроб Маҳмадов изҳор карда буд, ки ин созишнома 31 январи соли 2012 дар Брюссел ба имзо расида, мутобиқи он, НАТО ба Тоҷикистон дар масоили нигоҳдорӣ, нобуд кардани маводи хатарноки тарканда ва омодасозии мутахассисон дар ин самт кӯмак хоҳад кард. «Сарпарастони амалисозии созишнома аз ҷониби НАТО Британияи Кабир ва Ҷопон мебошанд», – гуфта буд вай.
Зимни суханронӣ дар ин робита вакили парлумон Суҳроб Шарифов зикр кард, ки ба вакилон аксари бандҳои созишнома нофаҳмо буда, «ӯ дар бораи чӣ нафъ доштани ин созишнома ба Тоҷикистон қариб чизе нафаҳмидааст». «Ба фикрам, касе чизеро аз мо пинҳон нигоҳ доштанист», – иброз дошта буд номбурда.
Ғайр аз ин, С.Шарифов аз намояндаи Вазорати мудофиа суол кард, ки оё ин созишнома ба уҳдадориҳои Тоҷикистон дар доираи СААД мухолифат надорад ва ин суол бидуни посух боқӣ монд.
Раиси МН МО ҶТ Шукурҷон Зуҳуров иброз дошта буд, ки айни замон кумитаи дахлдори парлумонӣ, Вазорати мудофиа ва ҳукумат ба шарҳи ҷузъиёти созишномаи мазкур омода нестанд.
Дар шарҳу тавзеҳи масъалаи мазкур мушовири давлатии президент оид ба сиёсати ҳуқуқӣ ва намояндаи ваколатдори сарвари давлат дар ҳарду палатаҳои парлумони ҷумҳурӣ Ҷумъахон Давлатов таъкид намуда буд, ки созишномаи зикршуда бо забонҳои англисиву фаронсавӣ ба тасвиб расида, тарҷумаи он ба забони тоҷикӣ ба нусхаи аслӣ муувофиқат намекунад ва бо ин сабаб миёни вакилон нофаҳмиҳо рух додааст.
