Ба муносибати 20-умин солгарди роҳандозии муносибатҳои дипломатӣ миёни Тоҷикистону Туркманистон президенти Тоҷикистон Эмомалӣ Раҳмон ба ҳамтои туркмани худ Гурбонгули Бердимуҳамедов барқияи шодбошӣ ирсол намуд.
Бино ба иттилои хадамоти матбуоти сарвари давлат, дар барқияи табрикотии Эмомалӣ Раҳмон зикр мегардад, ки аз лаҳзаҳои ба даст овардани истиқлолият кишварҳоямон мунтазам ба пурра сохтани мазмуни нави ҳамкориҳои байнидавлатии худ, бо ҳамгиройии фаъол дар арсаи байналмилалӣ, кӯшиш мекунанд.
«Имрӯз, дар идомаи анъанаҳои хуби муносибатҳои дӯстӣ ва ҳусни таваҷҷуҳи мутақобилаи халқҳоямон, ки решаи амиқи таърихӣ доранд, муносиботи Тоҷикистону Туркманистон динамикаи баланди рушд дорад. Дар андозагирии сиёсӣ миёни кишварҳои мо дар асоси принсипҳои ошкоро, боварӣ ва дастгирии мутақобила муколимаи доимӣ дар сатҳи олӣ ба роҳ монда шудааст», – баён мегардад дар барқияи сарвари давлати Тоҷикистон.
Дар барқияи шодбошии президенти Туркманистон Гурбонгули Бердимуҳамедов ба унвони Эмомалӣ Раҳмон баён мегардад, ки дар ин давра робитаҳои дӯстонаи кишварҳо самаранок рушд ёфта, мунтазам густариш меёбанд. «Бо таваҷҷуҳ ба сатҳи баланди кунунии равобити миёни кишварҳоямон, мехоҳам махсус таъкид намоям, ки тайи солҳои охир ҳамкориҳои дуҷониба марҳилаи наверо касб кардаанд», – омадааст дар барқия.
«Боиси хушнудист, ки таваҷҷуҳи дуҷониба дар густариши минбаъдаи муколима ва ҳамгироӣ дар ҳамаи соҳаҳо, дар асоси принсипҳои баробарӣ, эҳтироми ҷонибҳо ва дӯстии манфиатноки дуҷонибаи халқҳои Туркманистону Ҷумҳурии Тоҷикистон мавҷуданд. Имрӯз кишварҳои мо ба таври васеъ муваффақона ҳамкорӣ менамоянд ва мо ба таҳкими муносибатҳои дуҷонибае, ки ҷавобгӯи ҳавасмандии дарозмуддати кишварҳоямонанд, аҳамияти калон медиҳем», – изҳор мешавад дар барқияи президенти Туркманистон.
