Ҳайати мушовараи судии суди ноҳияи Киеви шаҳри Симферопол ду шаҳрванди Тоҷикистон, бародаронро ба 11 ва 8,5 соли зиндон маҳкум кард. Суд онҳоро ба узвият дар гурӯҳи ҷиноятпешаи байнулмилалӣ, ки воситаи интиқоли героин ба Украинаро роҳандозӣ намуда буданд, гунаҳкор эътироф намуд.
Дар сомонаи расмии Хадамоти амнияти Украина дар ин робита зикр мегардад, ки моҳи августи соли 2012 дар фурудгоҳи байнулмилалии «Бориспол» кормандони хадамот дар Қрим шаҳрванди 17-солаи Тоҷикистонро боздошт намудаанд, ки аз Душанбе ба Украина омада буд.
«Ин ҷавон ба интиқоли қариб 300 грамм героин дар дохили меъдаи худ (46 адад ғилофак) тавассути марзи давлатӣ кӯшиш ба харҷ дода, тафтиш созмондеҳи ин амал будани бародари ӯро, ки муддати зиёд дар Қрим иқомат дошт, ошкор намуд. Қаблан низ бародари ӯ барои даст доштан дар муомилоти ғайриқонунии маводи мухаддир ба ҷавобгарии ҷиноятӣ кашида шуда буд», – зикр мегардад дар хабар.
Мувофиқи қарори ҳайати мушовараи судӣ, ҳарду бародарон ба қочоқи воситаҳои нашъаовар ба миқдори ниҳоят зиёд муттаҳам дониста шуданд. Бародари калонӣ ҳамчунин ба ҷалби ноболиғон ба фаъолияти ҷинояткорона айбдор дониста шуд.
