Дар доираи баргузории амалиёти «Кӯкнор-2013» кормандони Раёсати ВКД ҶТ дар вилояти Хатлон 717 кило маводи мухаддирро аз муомилоти ғайриқонунӣ мусодира намуданд.
Тавре ба ОИ «Азия-Плюс» муовини сардори Шуъбаи мубориза бо гардиши ғайриқонунии маводи нашъаовари РВКД ҶТ дар вилояти Хатлон Ҷӯрахон Маҳмадов дар ин робита хабар дод, дар ҷараёни амалиёти аз санаи 20-уми майи соли равон оғозгардида кормандони милисаи вилоят аз 66 ҳодисаи кӯшиши муомилоти ғайриқонунии маводи мухаддир ҷилавгирӣ намудаанд. «Нисбати ин ҳодисаҳо дар 46 ҳолат парвандахои ҷиноӣ боз гардида, дар 24 ҳолати дигар қонуншиканон ба ҷавобгарии маъмурӣ кашида шуданд», – гуфт номбурда.
Ба қавли ӯ, аз 717 кило маводи мухаддири дар доираи амалиёт мусодирашуда, аз ҷумла 6 килояшро маводи сахттаъсири героин, беш аз 21 килояшро афюн ва зиёда аз 607 килояшро маводи мухаддири гурӯҳи каннабис ташкил медиҳад.
Зимнан зикр гардид, ки аз оғози сол кормандони милисаи Хатлон аз муомилоти ғайриқонунӣ 1 тоннаву 398 килову 306 грамм маводи нашъаовар, аз ҷумла 41 кило героин, беш аз 21 кило афюн, 118 кило ҳашиш ва 1 тоннаву 218 кило маводи мухаддири гурӯҳи каннабисро дарёфт ва мусодира карданд.
