Президенти Тоҷикистон Эмомалӣ Раҳмон ба муносибати ҷашни солгарди миллии Олмон ба президенти ин кишвар Йоахим Гаук барқияи табрикӣ ирсол намуд.
Бино ба иттилои хадамоти матбуоти сарвари давлат, дар барқияи зикр мегардад, ки муносибатҳои байнидавлатӣ ва ҳамкории гуногунарсаи судманди кишварҳо дар солҳои охир, ба таври муассир густариш ёфта, тобишҳои ҷадиду созанда пайдо кардаанд.
«Ин таҷрибаи муфиду бузург тақозо менамояд, ки дар шароити имрӯза низ мо ҳамкориҳои судманди гуногунарсаро рушду густариш бахшида, сатҳи онро ба зинаҳои баландтар бардорем», – баён мегардад дар барқия.
Дар барқия таъкид мегардад, ки Тоҷикистон, ба иҷрои комили аҳду паймонҳои ҳосилшудаи дуҷониба аҳамияти хос дода, итминон дорад, ки бо саъю эҳтимоми ҳарду ҷониб ҳамкориҳои ду кишвари дӯст ба пояҳои баландтари рушду тавсеа хоҳанд расид.
