Кормандони Агентии назорати маводи нашъаовари назди Президенти Ҷумҳурии Тоҷикистон дар сарҳади афғону-тоҷик, дар ҳудуди ноҳияи наздисарҳадии Ҳамадонии вилояти Хатлон дар ҳамкорӣ бо ҳамкасбони Кумитаи давлатии амнияти миллии Ҷумҳурии Тоҷикистон амалиёти махсусро гузарониданд.
Бино ба иттилои шуъбаи робита бо ҷомеаи Агентӣ, ҳангоми амалӣ намудани амалиёти бисёрмарҳила, ки дар давоми якчанд моҳ коркард шуда буд, канали махсусан калони интиқоли маводи мухаддир аз Ҷумҳурии Исломии Афғонистон ба кишварҳои Осиёи Марказӣ ва минбаъд ба Россияву Европа баста шуд.
Қочоқчиёни афғон, ки бо силоҳи оташфишон мусаллаҳ буданд, аз торикии шаб истифода ва сарҳади давлатиро ғайриқонунӣ убур намуда, кӯшиш намуданд маводи мухаддири ҳаҷман бисёр калонро аз Афғонистон ба қаламрави кишвари мо интиқол диҳанд.
Ба амри убур накардани сарҳад, қочоқчиён аз силоҳи оташфишон тирпаррониро шурӯъ намуданд.
Дар ҷараёни тирпарронӣ яке аз саркардагони гурӯҳи ҷиноятпешаи мухаддиротӣ кушта ва ба дигар аъзоёни гурӯҳ муяссар шуд, ки дар он тарафи сарҳад паноҳ баранд.
Дар натиҷа, дар ҷои ҳодиса як халта пайдо карда шуд, ки дар дохили он 14 брикети ранги ҷигарӣ бо бӯи махсус, инчунин маводи алафмонанд ёфт ва мусодира карда шуд.
Илова бар ин аз ҷои ҳодиса 2 адад норинҷаки дастии зиддипиёдаи Ф-1 ва дигар лавозимоти ҷангӣ мусодира гардид. Тибқи хулосаи ташхисӣ, маводи гирифташуда навъи “ҳашиш” ва “каннабис” буда, вазни он 15 килоро ташкил дод.
Ҳамин тариқ, ҳаҷми махсусан калони маводи мухаддир, ки барои интиқоли минбаъда ба кишварҳои Осиёи Марказӣ ва баъдан ба Россияву Европа пешбинӣ ва маблағҳои аз фурӯши он бадастомада барои маблағгузории гурӯҳҳои муташаккили ҷиноятпеша, инчунин экстремистҳо ва террористҳо мумкин истифода мешуд, несту нобуд гардид.
