Раиси Ҳизби сотсиал-демократии Тоҷикистон Раҳматилло Зойиров ҷиҳати муайян кардани мақсади имкон надодан ба баргузории конфронси матбуотӣ дар коргоҳаш ва бо супориши кӣ сурат гирифтани ин амал
ба мақомоти прокуратура
муроҷиат карданист.
Дар суҳбат бо хабарнигори ОИ «Азия-Плюс» дар ин робита ӯ изҳор намуд, ки имрӯз ному насаби гурӯҳи шахсони ба толори дафтари корӣ воридшуда мушаххас гардида, сипас изҳороти ҲСДТ қабул ва онҳо ба прокуратураи генералӣ муроҷиат мекунанд.
Ба гуфтаи Зойиров, шумори гурӯҳи ба толор воридшуда 21 нафар буда, онҳо изҳор кардаанд, ки ҳамсояанд, вале раиси маҳаллаҳои наздики дафтари корӣ онҳоро намешиносанд. «Инҳо сокинони маҳаллӣ ва ҳамсоя набуда, занон як гурӯҳи сайёри ҳукумати шаҳранд, ки миёни онҳо аз ҷумла кормандони ҳукумати шаҳр ва афроди дар гирдиҳамоии назди сафорати ИМА иштироккарда ҳузур доранд. Ҳамчунин миёни мардон се нафар кормандони ВКД, яъне гурӯҳи ҳимоят ва дастгирӣ низ буданд», – гуфт ӯ.
Ёдрас мекунем, ки роҳбари ҲСДТ журналистонро барои маълумот додан аз сафараш ба Украина, муддати ду рӯз дар Евромайдон қарор доштану шахсан мушоҳида кардани рӯйдодҳо дар майдони марказии шаҳри Киев гирдиҳам оварда буд, аммо як гурӯҳ занон ба толори барои конфронси матбуотӣ таъингардида ворид шуда, Р.Зойировро ба кӯшиши ташкили ҷанги нави шаҳрвандӣ дар Тоҷикистон айбдор намуданд.
