Тасмими аз марзи давлатӣ ба макони таъиноти доимӣ интиқол додани воҳидҳои нерӯҳои марзбонӣ ва воҳидҳои махсуси мақомоти корҳои дохилии кишварҳо, ки чанде қабл дар Исфара сари он тавофуқ ҳосил шуд, ягона тасмими оқилонаи ҷонибҳо аст. Ин нуктаро дар мусоҳиба ба хабарнигори ОИ «Азия-Плюс» раиси ҲКТ, вакили парлумон Шодӣ Шабдолов зикр кард.
«Дар ин вазъ сарбозони ҷавонони мусаллаҳро, ки ҳанӯз аз таҷрибаи зиндагӣ ба таври кофӣ бархӯрдор нестанд, набояд рӯ ба рӯи ҳам гузошт», – иброз дошт Шабдолов.
Ба андешаи ӯ, тибқи маълумоти расмӣ, муноқишаҳо дар марзи Тоҷикистону Қирғизистон бо сабаби мушаххас набудани қаламравҳои ҳарду ҷониб рух медиҳанд, вале бо камоли итминон метавон гуфт, ки ин низоъҳо бар асари истифодаи захираҳои обӣ ба вуқӯъ мепайванданд.
«Имрӯз Тоҷикистону Қирғизистонро зарур аст, ки мудом дар муколамаи сиёсӣ буда, далелу бурҳонҳои худро оид ба минтақаҳои баҳсӣ на бо нишон додани зӯри бозу, балки бо харитаву ҳуҷҷатҳо асоснок намоянд», – зикр кард раиси ҲКТ.
Номбурда ҳамчунин қайд кард, ки ҳангоми узвият ба СММ тамоми кишварҳои дунё далели ҷой надоштани даъвоҳо оид ба қаламрави кишвари дигарро тасдиқ намуда, марзҳои мавҷударо дахлнопазир эътироф мекунанд. «Дар сурати акс онҳоро ба узвияти СММ қабул намекунанд. Зимни узвият ба СММ Тоҷикистону Қирғизистон ҳатман ин маросимҳоро паси сар кардаанд», – афзуд Шабдолов.
