Душанбе. 13-уми август. ОИ «Азия-Плюс» – Дар таърихи 15-уми август дар шаҳри Маскав ҷаласаи 9-уми комиссияи байниҳукуматии ҳамкории иқтисодии Тоҷикистону Русия доир мегардад, ки дар он вазъ ва дурнамои ҳамкории дуҷонибаи кишварҳо мавриди баррасӣ қарор хоҳанд гирифт.
Сардори департаменти иттилооти Вазорати умури хориҷии Тоҷикистон Давлат Назриев ба ОИ «Азия-Плюс» изҳор дошт, ки айни замон дар Маскав гурӯҳи корӣ қарор дорад, ки масъалаҳои рӯзномаи ҷаласаро омода месозад.
Ба гуфтаи ӯ, дар ҷаласа бо иштироки раисони комиссия – муовини аввали сарвазири ҶТ Асадулло Ғуломов ва роҳбари маъмурияти президенти Русия Сергей Наришкин масъалаҳои ҳамкориҳо дар соҳаи тиҷорату иқтисод, энергетика, саноат, нақлиёт, кишоварзӣ, илму маориф, муҳоҷирати меҳнатӣ ва ғайра муҳокима хоҳанд гардид.
Сомонаи расмии вазорати рушди иқтисод ва савдои Русия иттилоъ медиҳад, ки аз рӯи натиҷаҳои ҷаласа протокол ба имзо хоҳад расид.
