Зимни амалиёти кормандони мақомоти милисаи шаҳри Кӯлоб ба гумони даст доштан дар ташкил ва нигоҳдории қиморхона сокини 42-солаи шаҳр Абдулмаҷид Ҳотамов боздошт шуд.
Бино ба иттилои маркази матбуоти ВКД ҶТ, боздоштшуда дар манзили шахсиаш қиморхонаи пинҳонӣ ташкил карда, замони боздошти ӯ дар он се нафар сокинони шаҳр машғули қиморбозӣ будаанд.
«Барои шароит фароҳам овардан ба қиморбозӣ дар манзилаш, ӯ аз онҳо ҳаққи хизматашро дар ҳаҷми 1180-сомонӣ гирифтааст», – баён мегардад дар хабар.
Дар Тоҷикистон фаъолияти ташкили қиморхонаҳо қонунӣ манъ аст. Ҳанӯз соли 2001 президенти мамлакат Эмомалӣ Раҳмон дар бораи манъи фаъоляити қиморхонаҳо дар қаламрави кишвар фармони махсус ба имзо расонида буд.
