Роҳбари бахши Ҳизби наҳзати исломии Тоҷикистон дар Вилояти Мухтори Кӯҳистони Бадахшон Саодатшо Адолатов ба гумони барангехтани кинаю адовати динӣ боздошт шуд.
Дар иттилоияи расмии Кумитаи давлатии амнияти миллии Тоҷикистон дар ин робита зикр мегардад, ки нисбати Саодатшо Адолатов мутобиқи моддаи 189-и Кодекси ҷиноии ҶТ (Барангехтани кинаву адовати динӣ, инчунин тарғиби бартарии шаҳрвандон аз нигоҳи муносибати онҳо ба дин) парвандаи ҷиноӣ боз шуда, тафтиши пешакӣ ҷараён дорад.
Саодатшо Адолатови 40-сола рӯзи 14-уми апрел дар ҷамоати Язғуломи ноҳияи Ванҷ аз ҷониби кормадони КДАМ ба гумони даст доштан дар барагехтани адовати динӣ миёни ҳамдеҳагонаш боздошт шудааст.
Гуфта мешавад, номбурда чандин маротиба ба таври оммавӣ ба таҳқири сокинони маҳаллӣ даст зада, фазои носолими якдигарбадбиниро ба миён овардааст. Нисбат ба амалҳои ғайриқонунии С.Адолатов зиёда аз 30 нафар сокинони минтақаҳои мазкур бо шикоят ба мақомоти дахлдори кишвар муроҷиат намудаанд.
«Тибқи маълумоти пешакӣ, дар ҳаракатҳои С.Адолатов барангехтани кинаву адовати динӣ, инчунин тарғиби бартарии шаҳрвандон аз нигоҳи муносибати онҳо ба дин дида мешавад», – омадааст дар иттилоияи КДАМ.
То ин замон ба Хабаргузории «Азия-Плюс» муяссар нашуд, ки шарҳи раҳбарияти Ҳизби наҳзати исломии Тоҷикистионро дар мавриди ин қазия дастрас намояд.
Ёдрас мекунем, ки моҳи августи соли 2013 Саодатшо Адолатов раҳбарии бахши ҲНИТ дар Вилояти Мухтори Кӯҳистони Бадахшонро ба уҳда гирифт. То ин дам ба ҳайси раиси бахши ҲНИТ дар ВМКБ Сабзаалӣ Мамадризоев фаъолият мекард, ки ҳангоми амалиёти махсус дар Хоруғ рӯзи 25-уми июли соли 2012 кушта шуд.
