Роҳи мошингарди Исфара – Ворух, ки пас аз муноқишаи ахир дар марзи давлатӣ ва осеб дидани 60 нафар аз ҳарду тараф бар асари он аз ҷониби шаҳрвандони Қирғизистон баста шуда буд, аз 9-уми май барои ҳаракат боз шуд. Дар бора як манбаъ аз ҳукумати вилояти Суғд хабар дод.
«Миёни аҳолии маҳаллаҳои аҳолинишини ҳарду тараф оид ба минбаъд роҳ надодан ба чунин ҳодисаҳо ва пешгирии вазъи нооорому ташвишовар дар марзи давлатӣ корҳои фаҳмондадиҳӣ гузаронида шуда истодаанд», – гуфт манбаъ.
Бино ба иттилои шуъбаи робита бо ҷомеа ва ВАО-и Хадамоти давлатии марзбонии Қирғизистон, санаи 8-уми май миёни намояндагони хадамотҳои марзбонии Қирғизистону Тоҷикистон мулоқот доир гардида дар он масъалаи ба ифоқа овардани вазъи мавҷуда дар марз баррасӣ шудаанд. «Нуқтаҳои гузаргоҳҳо дар марзи давлатии Тоҷикистону Қирғизистон дар реҷаи муқаррарӣ фаъолият доранд», – иттилоъ медиҳад хадамоти марзбонии кишвари ҳамсоя.
Қаблан хадамоти мазкур
иттилоъ дода буд,
ки дар маҳаллаи аҳолинишини Қизил-Бел (Қирғизистон), ҳудуди 500 метр дуртар аз гузаргоҳи марзии «Қизил-Бел автодорожный» ва дар маҳаллаи аҳолинишини Оқсой (ҶҚ) аз ҷониби шаҳрвандони Қирғизистон роҳи мошингарди Исфара – Ворух баста аст.
Ёдрас мекунем, ки қарибиҳои шоми рӯзи 7-уми май дар марзи Тоҷикистону Қирғизистон, дар роҳи мошингарди миёни Исфара ва ҷамоати Ворух, наздикии деҳаи қирғизии Куктош миёни шаҳрвандони ҳарду кишвар муноқишаи навбатӣ ба вуқӯъ пайваста, бар асари он ҳудуди 60 нафар аз ҳарду ҷониб осеб диданд.
Дар ҳамин ҳол, гуфтушуниди навбатии гурӯҳи кории Тоҷикистону Қирғизистон оид ба масъалаҳои марбут ба марзи давлатӣ рӯзи 11-уми май дар шаҳри Душанбе пешбинӣ шудааст.
