– Субҳи имрӯз дар шаҳри Хоруғ ба қарордод миёни ҳукумати ҶТ ва намояндагони ҷомеаи шаҳрвандии ВМКБ бобати ба эътидол овардани вазъ дар Бадахон протокол ба имзо расид, – иттилоъ дод хабарнигори «Азия-Плюс» аз маркази маъмурии ВМКБ – шаҳри Хоруғ.
Намояндаи ҷомеаи шаҳрвандии ВМКБ Алим Шерзамонов ба «Азия-Плюс» дар ин робита иттилоъ дод, ки маросими имзои протокол соати 8:30 субҳ дар бинои комиссариати ҳарбии вилдоят доир гардида, айни замон дар маҷлисгоҳи ҳукумати ВМКБ вохӯрии гурӯҳи намояндагони ҳукумат бо фаъолони вилоят ҷараён дорад.
«Аз 9 банди дар қарордод зикршуда оид ба 8 банд тавофуқ ҳосил шуда, ягона банде, ки аз рӯи он ҷонибҳо ба созиш омада натавонистанд, банди 4 дар бораи ба ҷавобгарии ҷиноятӣ ҷалб накардани иштирокчиёни бетартибиҳо аст, ки кушода боқӣ монд ва он зимни машваратҳои минбаъда ҳаллу фасл хоҳад шуд», – иброз дошт ӯ.
Шерзамонов таъкид намуд, ки аз рӯи банди сеюм дар бораи аз мансаб барканор кардани роҳбарони мақомоти интизомӣ дар Хоруғ, ҷонибҳо ба мувофиқа расиданд, ки ин масъала бояд дар сатҳи президент ҳал шавад, зеро ба салоҳияти ӯ дохил аст. «Ҷонибҳо қарори президент аз рӯи ин масъаларо интизор хоҳанд шуд», – гуфт номбурда.
Протокол ба созишномаро аз ҷониби ҳукумат Шералӣ Хайруллоев, раиси ҳайати ҳукумат, Абдулло Навҷувонов, муовини вазири корҳои дохилӣ, Суҳроб Саноев, муовини раиси КДАМ, раиси ВМКБ Шодихон Ҷамшедов, раиси шаҳри Хоруғ Фаромӯз Имомбердиев, генерал Холбаш Хобашев ва намояндагони ҷомеаи шаҳрвандии ВМКБ ба имзо расониданд.
Дар ҳамин ҳол, чанде қабл дар Хоруғ намояндагони ҷомеаи шаҳрвандӣ, ки ба ҳайати комиссияи муштараки таҳқиқи ҳодисаҳои Хоруғ шомиланд, бо намояндагони ҳукумат оид ба ифшо накардани ҷараёни тафтиши ҳодисаҳои Хоруғ
тавофуқ ҳосил карданд.
Ёдрас мекунем, ки ҷомеаи шаҳрвандии ВМКБ-ро Музаффар Муборакшоев, ҳуқуқшинос Фаромӯз Эргашев, нафақахӯр Бахтовар Бахтиёров ва шаҳрванди бекор Хурсанд Мамадшоев намояндагӣ мекунанд. Ҳамчунин ба сифати нозирон ба ин рӯйхат раиси шӯрои маҳаллаи Хоруғи Боло Маҳмадбоқир Маҳмадбоқиров, раиси шӯрои маҳаллаи «Хлебзавод» Толиб Айёмбеков, раиси шӯрои маҳаллаи УПД Зоир Раҷабов, намояндаи ҷомеаи шаҳрвандӣ Ёғибек Ёғибеков, сардори Раёсати нерӯҳои марзбонии Бадахшон Холбаш Холбашев, раиси бахши ҲСДТ дар ВМКБ Алим Шерзамонов ва роҳбари ташкилоти ҷамъиятии «Номус ва инсоф» Улфат Мамадшоева шомил гардидаанд.
