Кормандони милисаи шаҳри Кӯлоб ду нафар гумонбаршудагон ба амали майдавбошӣ нисбати раиси ҲНИТ Муҳиддин Кабириро, ки ки санаи 10-уми июн содир гардида буд, боздошт намуданд.
Аз Шуъбаи ВКД Тоҷикистон дар шаҳри Кӯлоб ба «Азия-Плюс» дар ин робита иттилоъ доданд, ки боздоштшудагон сокинони Кӯлоб набуда, парвандаи маъмурии нисбати онҳо оғозгардида аллакай ҷиҳати баррасӣ ба суд фиристода шудааст.
Ёдрас мекунем, ки
санаи 10-уми июн
ҳангоми аз дафтари кории ҳизб ба берун баромадани раиси ҲНИТ Муҳиддин Кабирӣ пас аз вохӯрӣ бо ҷавонони маҳаллӣ дар Кӯлоб, чанд нафаре ба сӯи ӯ тухми мурғу помидор партофтанд.
Дар робита ба ҳодисаи ҳамла ба раиси Ҳизби наҳзати исломии Тоҷикистон Муҳиддин Кабирӣ Шӯрои сиёсии ҲНИТ
изҳороти расмӣ
интишор намуд.
Дар ҲНИТ ҳамчунин зикр карданд, ки субҳи рӯзи 10-уми июн қабл аз вохӯрии раиси ҲНИТ бо ҷавонон, кормандони нозироти андози Кӯлоб дарҳои дафтари кории ҳизбро муҳр задаанд ва аз ин рӯ, лозим омадааст, ки вохӯриро дар манзили раиси шуъбаи ҳизб дар шаҳри Кӯлоб Муҳаммадшариф Набизода гузаронанд. Бино ба маълумоти ҲНИТ, дар вохӯрӣ беш аз 150 нафар намояндагони ҷавонони шаҳр ҳузур доштаанд.
«Пас аз вохӯрӣ назди даромадгоҳи дар гурӯҳи занону мардони иборат аз 15 нафар ба сӯйи Кабирӣ помидору тухм ва санг партофтанд ва бо алфози қабеҳ ӯро дашном доданд. Онҳо аъзои ҳизбро ба сар задани ҷанги шаҳрвандии аввали солҳои 90-уми ва кӯшиши имрӯз ноамн кардани вазъи ҷумҳурӣ айбдор мекарданд», – ҳикоят кард сухангӯи ҲНИТ.
Намояндагони ҳизб таҳти раҳбарии Муҳиддин Кабирӣ макони ҳодисаро саривақт тарк карда натавонистанд, зеро роҳи онҳоро автомашинаҳои дорои рақамҳои давлатии 63 66, 43 44, 33 22 банд карда буданд.
«Ҳангоме ки чанде аз аъзои ҳизб кӯшиш карданд, ки воқеъаро тариқи видео наворбардорӣ кунанд, издиҳом ба онҳо дарафтода, планшети яке аз намояндагони ҳизбро шикаст. Мо аз мақомоти корҳои дохилии шаҳри Кӯлоб таҳқиқи ҳодисаро талаб хоҳем кард», – гуфтанд дар ҲНИТ.
