Санаи 10-уми октябри соли равон дар шаҳри Минск таҳти раёсати президенти Беларус Александр Лукашенко нишасти навбатии сарони кишварҳои узви Иттиҳоди Давлатҳои Мустақил (ИДМ) доир мегардад.
Бино ба маълумоти хадамоти матбуоти Кумитаи иҷроияи ИДМ, дар нишасти мазкур қабули қарор дар бораи дар соли 2015 амалисозии барномаи байниҳукуматии «Пойтахтҳои фарҳангии Иттиҳод» дар Русия ва Тоҷикистон ва мутаносибан пойтахтҳои фарҳангии ИДМ эълон кардани шаҳрҳои Воронеж ва Кӯлоб дар соли 2015 дар назар аст.
Ба иттилои манбаъ, рӯзномаи нишаст 17 лоиҳаи санадҳоро дар бар мегирад, ки ба рушди минбаъдаи ҳамкориҳои байнидавлатӣ дар соҳаҳои гуманитарӣ, таъмини амният ва дигар бахшҳо равона гардида, ҳамчунин як қатор масоили тадорукотӣ низ баррасӣ мешаванд.
Гуфта мешавад, яке аз санадҳои муҳими баррасишаванда лоиҳаи Муроҷиатномаи сарони кишвархои узви ИДМ ба мардуми давлатҳои иштирокчии Иттиҳод ва ҷомеиа ҷаҳонӣ дар робита ба 70-умин солгарди Ғалабаи мардуми Шӯравӣ дар Ҷанги Бузурги Ватанӣ аст.
