Рӯзи шанбеи ҳафтаи сипаришуда, дар рӯзи сеюми оғози маъракаи даъват ба хизмати ҳатмии ҳарбӣ дар сафи Қувваҳои Мусаллаҳи Тоҷикистон аз шаҳри Истиқлол (собиқ Табошар)-и вилояти Суғд аз иҷрои нақшаи даъват мужда расониданд. Дар ин бора ба «Азия-Плюс» як манбаъ аз Вазорати мудофиаи ҷумҳурӣ хабар дод.
«Нақшаи даъват ба хизмати ҳатмии ҳарбӣ дар шаҳри Истиқлол 107% ба иҷро расида, қариб ҳама даъватшавандагон ихтиёран ба хизмат дар сафи Қувваҳои Мусаллаҳи ҷумҳурӣ ҳозир шуданд», – таъкид дошт манбаъ.
Бино ба иттилои манбаъ, рӯзҳои нахусти оғози мавсими даъват ба хизмати ҳарбӣ дар баробари шаҳри Истиқлол, ноҳияи Носири Хусрав ва Балҷувони вилояти Хатлон низ аз уҳдаи иҷрои нақшаи даъват баромадаанд.
«Дар мавсими даъвати кунунӣ ба вазъи солимии сарбозони оянда ва сатҳи саводнокии онҳо таваҷҷуҳи хосса зоҳир мешавад», – гуфтанд дар Вазорати мудофиаи ҶТ.
Ёрас мекунем, ки мутобиқи фармони президенти кишвар, маъракаи даъвати тирамоҳӣ ба хизмати ҳатмии ҳарбӣ дар сафи Қувваҳои Мусаллаҳи Тоҷикистон 1-уми октябр оғоз гардида, 30-юми ноябри соли равон ба итмом мерасад.
