– Дар интихоботи ахири моҳи феврали соли оянда ба палатаи поёнии парлумони кишвар Ҳизби халқии демократии Тоҷикистон 68 нафар номзадҳо аз ҳисоби аъзои ҳизб ва ғайриҳизбиёнро пешбарӣ карданист, – иброз дошт ба «Азия-Плюс» Усмон Солеҳ, мудири шӯъбаи таблиғот, иттилоот ва матбуоти Дастгоҳи КИМ ҲХДТ.
Ба гуфтаи ӯ, тибқи дастурҳои пешвои ҲХДТ, президенти мамлакат Эмомалӣ Раҳмон зимни пешбарии номзадҳо ба вакилӣ ба ҷавонон ва занон афзалият дода мешавад.
«ҲХДТ ба рӯйхати ҳизбии худ ҳамчунин ғайриҳизбиёнро, ки сиёсати мавриди амал қароргирифтаи президенти Тоҷикистон, пешвои ҳизби моро фаъолона дастгирӣ мекунанд, низ шомил карда метавонад», – қайд кард ӯ.
Номбурда хотиррасон намуд, ки анҷумани ғайринавбатии ҳизби ҳоким дар Тоҷикистон рӯзи 12-уми декабр дар маҷмааи «Кохи Ваҳдат»-и пойтахт доир мегардад, ки дар кори он беш аз 1 ҳазор 200 нафар вакилон аз саросари кишвар иштирок мекунанд. Дар ин анҷуман рӯйхати ҳизбии ҲХДТ аз ҳавзаи ягонаи умумиҷумҳуриявии интихоботӣ муайян карда мешавад.
Ҳизби халқии демократии Тоҷикистон 10-уми декабри соли 1994 таъсис ёфта, айни замон шумори аъзои он ҳудуди 250 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
Ёдрас мекунем, ки палатаи поёнии парлумони Тоҷикистон аз 63 вакил иборат аст, ки 41 нафарашон аз ҳавзаҳои интихоботии якмандатӣ ва 22 нафар вакил тибқи рӯйхати ҳизбӣ аз ҳавзаи ягонаи умумиҷумҳуриявӣ интихоб мешаванд.
То имрӯз 8 ҳизби сиёсии Тоҷикистон санаи баргузории анҷуманҳои пешазинтихоботии худро муайян карданд. Анҷуманҳои пеш аз интихоботро Ҳизби халқии демократии Тоҷикистон – 13-уми декабр, Ҳизби коммунисти Тоҷикистон – 27-уми декабр, Ҳизби сотсиалист ва Ҳизби сотсиал-демократии Тоҷикистон – 17-уми декабр, Ҳизби наҳзати исломии Тоҷикистон – 16-уми декабр, Ҳизби аграрии Тоҷикистон – 18-уми декабр, Ҳизби ислоҳоти иқтисодии Тоҷикистон – 13-уми декабр ва Ҳизби демократии Тоҷикистон – 20-уми декабр баргузор мекунанд.
