Рӯзи 23 ноябри соли 2014 дар шаҳри Кувайт Валиаҳди Давлати Кувайт шайх Навоф ал-Аҳмад ал-Ҷобир ас-Сабоҳ ҳайати Ҷумҳурии Тоҷикистонро таҳти роҳбарии Вазири корҳои хориҷии кишвар Сироҷидин Аслов ба ҳузур пазируфт.
Бино ба маъулмоти департаменти иттилооти ВКХ Тоҷикистон, зимни суҳбат перомуни масоили муносибатҳои Тоҷикистону Кувайт ва дурнамои рушди он мубодилаи афкор сурат гирифта, С.Аслов қайд намуд ки рушди ҳамкориҳо бо Давлати Кувайт самти афзалиятноки сиёсати хориҷии кишвар мебошад.
«Сироҷидин Аслов иброз дошт, ки дар ҳоли ҳозир муносибатҳои ду кишвар ба сатҳи сифатан нав баромадаанд ва изҳори умедворӣ намуд, ки вазорату идораҳои дахлдори Тоҷикистону Кувайт ҳамкории зичро ҳам дар сатҳи дуҷониба ва ҳам дар чаҳорчӯби Фонди кувайтии рушд вусъат хоҳанд дод», – омадааст дар иттилои ВКХ ҶТ.
Гуфта мешавад, дар ҷараёни мулоқот Вазири корҳои хориҷии кишвар ба Валиаҳди Кувайт паёми Президенти Ҷумҳурии Тоҷикистон Эмомалӣ Раҳмонро ба унвони Амири Давлати Кувайт шайх Сабоҳ ал-Аҳмад ал-Ҷобир ас-Сабоҳ тақдим намуд, ки дар он Эмомалӣ Раҳмон аз Амири Кувайт даъват ба амал овардааст, то дар фурсати муносиб сафари расмӣ ба Ҷумҳурии Тоҷикистон анҷом диҳад.
Зимнан зикр мегардад, ки ҳайати расмии Ҷумҳурии Тоҷикистонро таҳти роҳбарии Вазири корҳои хориҷии кишвар С.Аслов инчунин Вазири энергетика ва захираҳои об У. Усмонзода, Вазири нақлиёт Х. Асозода, Роҳбари Агентии захираҳои моддии давлатии назди Ҳукумати Ҷумҳурии Тоҷикистон Н. Аҳмадов ва дигар мансабдорони баланди вазорату идораҳои кишвар намояндагӣ карданд.
