Дар ҷаласаи навбатии иҷлосияи шашуми Маҷлиси намояндагони Маҷлиси Олии ҶТ даъвати чорум (17-уми декабр) масъалаи ворид намудани тағйироту илова ба қонуни конститутсионии ҶТ «Дар бораи мақомоти прокуратура» баррасӣ мешавад.
Тавре котиби матбуотии палатаи поёнии парлумони ҷумҳурӣ Муҳаммадато Султонов хабар дод, дар ҷаласа ҳамчунин масъалаи тасдиқи Созишнома байни ҳукумати Тоҷикистон ва ҳукумати Латвия оид ба ҳамкорӣ дар мубориза бар зидди терроризм, ҷинояткории муташаккилона ва муомилоти ғайриқонунии воситаҳои нашъаовар, моддаҳои психотропӣ ва прекурсорҳо ва дигар ҷиноятҳо низ муҳокима мегардад.
«Вакилони мардумӣ ҳамчунин масъалаи ворид намудани тағйироту илова ба қонун «Дар бораи ҳуҷҷати электронӣ»-ро низ баррасӣ мекунанд», – гуфт Султонов.
