Директори бозори «Ином»-и ноҳияи Шаҳритӯс Бурҳон Абдуллоев, ки дар робита ба муноқишааш бо додарарӯси президент Муҳибулло Саъдуллоев дар расонаҳо маъруф шуд, ба гумони оташзании бозори худаш боздошт шуд.
Санавбар Абдуллоева, ҳамсари Бурҳон Абдуллоев ба «Азия-Плюс» дар ин робита иттилоъ дод, ки аз 19-уми декабр ҳамсари ӯ дар Раёсати ВКД Хатлон қарор дошта, ӯ гӯё ба «фармоиш» додани оташзании бозори «Ином» ба ду ҷавон, ки минбаъд бо далели шайъӣ – шишаҳои бензин боздошт шудаанд, гумонбар дониста мешавад. «Ҳамсари маро дидаву дониста боздошт карданд, то ки мо бобати қарори беадолатонаи суд дигар ба ҳеҷ куҷо муроҷиат накарда, саҳми худро дар бозор талаб накунем», – гуфт ӯ.
Ба гуфтаи ин зан, субҳи рӯзи 19-уми декабр ӯ бо ҳамсари худ ба Душанбе омада, ҳамроҳи адвокат дар бинои Суди олӣ қарор доштаанд. «Ҳамсарам ним соат барвақттар аз бинои суд ба берун баромада, бедарак шуд. Баъдтар писарам аз Шаҳритӯс занг зада, изҳор намуд, ки ба ӯ аз шуъбаи корҳои дохилии ноҳия занг зада, хабар додаанд, ки падарашонро накобанд, зеро ӯ дар Раёсати ВКД Хатлон аст», – иброз дошт С.Абдуллоева.
Қаблан Санавбар Абдуллоева бо мактуби кушод ба раиси шаҳри Душанбе Маҳмадсид Убайдуллоев муроҷиат карда, дархост намуда буд, ки дар робита ба ғасби ғайриқонунии бозори «Ином» адолатро барқарор намуда, барои ин комиссияи махсус таъсис дода шавад. Абдуллоева умедвор аст, ки бо ёрии комиссия саҳмияҳои бозор баробар миёни оилаҳои Абдуллоевҳо ва Саъдуллоевҳо тақсим карда мешавад.
Ӯ ҳамчунин зикр кард, ки агар қарори Суди олӣ низ ғайриқаонатбахш содир гардад, пас «мо мушкилотро ба баррасии барномаи «Пусть говорят»-и шабакаи телевизионии ОРТ-и Русия пешниҳод мекунем».
