Дар Кӯлоб ронандаи автомашинаи тамғаи «Нексия» корманди шуъбаи Бозрасии давлатии автомобилии шаҳр Суҳроб Исмонқуловро бо якчанд зарбаи корд захмӣ кард.
Аз Раёсати ВКД Тоҷикистон дар вилояти Хатлон ба «Азия-Плюс» дар ин робита иттилоъ доданд, ки майор Суҳроб Исмонқулов рӯзи 16 май ҳангоми адои вазифаҳои хизматӣ дар посгоҳ, автомашинаи тамғаи «Нексия» таҳти идораи Мирзоаҳмад Камоловро боздоштанӣ мешавад, вале ронанда ба амри ӯ итоат намекунад.
«Майор бо автомашинааш ӯро дарёб намуда, аз соҳиби мошин дархост мекунад, ки шаҳодатномаи ронандагиашро пешниҳод намояд, вале Камолов бо корд ба корманди БДА ҳуҷум карда, бо се зарба ба шикам ӯро захмӣ месозад ва аз ҷойи ҳодиса ғайб мезанад. Афсари БДА дар ҳолати вазнин ба бемористон мунтақил гардид», – гуфт манбаъ.
Ба иттилои манбаъ, Мирзоаҳмад Кмолов базудӣ дастгир шуда, аз рӯи ин далел парвандаи ҷиноӣ боз ва таҳқиқи ҳодиса ҷараён дорад.
Ёдрас мекунем, ки санаи 22 апрели соли ҷорӣ суди ноҳияи Исмоили Сомонӣ сокини шаҳри Душанбе З.Салимовро барои итоат накардан ба амри корманди БДА ва дар болои автомашинааш кашола карда бурдани ӯ
ба 2,5 соли зиндон маҳкум кард.
