Кормандони Агентии назорати маводи нашъаовари назди Президенти ҶТ маълумоти оперативӣ гирифтанд, ки сокини вилояти Бадахшони Ҷумҳурии Исломии Афғонистон бо интиқоли воситаҳои нашъадор аз Афғонистон ба Тоҷикистон машғул мебошад. Дар ин бора дарҳол ба Вазорати корҳои дохилии Афғонистон хабар равон карда шуд.
Тибқи иттилои шуъбаи робита бо ҷомеаи Агентӣ, полиси мудирияти маводи мухаддири Вазорати корҳои дохилии Афғонистон қарор намуд, ки дар ҳудуди деҳаи Обараки улусволии Аргуи вилояти Бадахшон чорабинии оперативӣ гузаронад.
Ба иттилои манбаъ, ҳангоми ҳангоми гузаронидани чорабинӣ аз манзили истиқоматии шаҳрванд зиёда аз 32 кг маводи нашъаовари героин дарёфт ва мусодира ва айни ҳол соҳиби героин ба ҳабс гирифта шуда, парвандаи ҷиноятӣ оғоз гардидааст.
Гуфта мешавад, чорабиниҳои оперативӣ барои муайян ва дастгир намудани аъзоёни боқимондаи гурӯҳи ҷинояткор, ки бо муомилоти ғайриқонунии маводи нашъаовар машғул буданд, идома доранд.
Зимнан зикр мегардад, ки ҳамин тариқ, дар натиҷаи амалиёти муштараки ҷузъу томҳои зиддимухаддиротии Тоҷикистону Афғонистон фаъолияти боз як гурӯҳи ҷинояткор дар қаламрави Афғонистон қатъ гардид.
