Палатаи поёнии парлумони Тоҷикистон Созишномаи сармоягузорӣ байни ҳукумати Тоҷикистон ва ҶДММ «Ширкати байналмилалии истеҳсолии Чжунгтсай Моҳир Семент»-и Чинро тасдиқ кард.
Зимни суханронӣ назди вакилон оид ба ин масъала муовини аввали раиси Кумитаи давлатии сармоягузорӣ ва идораи амволи давлатии кишвар Лочин Файзуллозода изҳор дошт, ки дар созишнома сохтмони се корхонаи истеҳсоли семент, гаҷкартон ва халта пешбинӣ шуда, иқтидори корхонаҳо истеҳсоли 1,2 млн. тонна семент, 1 млн. метри мукааб гаҷкартон дар як сол ва 8 млн. дона халта дар як моҳро ташкил хоҳад дод.
«Амалисозии лоиҳа дар ноҳияи Ёвони вилояти Хатлон оғоз гардида, то охри сол ба истифода додаи корхонаҳои истеҳсоли гаҷкартон ва халта дар назар аст. Таҷҳизоти истеҳсолӣ барои корхонаҳои оянда ба ҷумҳурӣ ворид шуд», – гуфт Файзуллозода.
Пас аз мавриди истифода қарор гирифтани ин корхонаҳо наздики 1 ҳазор нафар бо ҷойи кори домӣ таъмин шуда, ба буҷети кишвар ба сифати андоз ҳамасола 120 млн. сомонӣ маблағ ворид мешавад.
Муовини аввали раиси Кумита ҳамчунин илова кард, ки арзиш умумии лоиҳаҳо ба 145 млн. доллари ИМА баробар аст.
Корхонаи муштараки «Ширкати байналмилалии истеҳсолии Чжунгтсай Моҳир Семент» аз ҷониби шарикони тоҷикистониву чинӣ таъсис дода шуда, бастаи назоратии саҳмияҳои корхона, яъне 75% – ба се тоҷири Чин ва 25% – ба шарикони тоҷикистонӣ тааллуқ доранд.
Бино ба маълумоти Кумитаи давлатии сармоягузорӣ ва идораи амволи давлатии ҶТ, «Ширкати байналмилалии истеҳсолии Чжунгтсай Моҳир Семент» барои дастгирии бахши иҷтимои ноҳияи Ёвоназ ҳисоби худ мактаби миёна сохта, ба бемористони маҳаллӣ ду автомашинаи ёрии таъҷилӣ тақдим кард.
Дар назар аст, ки бинои мактаби миёна моҳи апрели соли 2016 ба истифода дода мешавад ва сипас ин иншоот ба тавозуни ноҳия гузаронида мешавад. Арзиши сохтмони мактаб 13 млн. сомониро ташкил медиҳад.
