Раиси палатаи болоии парлумони ҷумҳурӣ Маҳмадсад Убайдуллоев чанде қабл ҷаласаи Маҷлиси миллии Маҷлиси Олии Тоҷикистонро баргузор намуд, ки дар он рӯзномаи иҷлосияи чоруми Маҷлиси миллии Маҷлиси Олии Тоҷикистон даъвати панҷум тасдиқ карда шуд. Иҷлосияи мазкур имрӯз доир мегардад.
Аз палатаи поёни парлумони ҷумҳурӣ ба «Азия-Плюс» иттлоъдоданд, ки дар иҷлосия тағийроту иловаҳои қаблан аз ҷониби Маҷлиси намояндагон қабушуда ба қонунҳо «Дар бораи мубориза бо терроризм», «Дар бораи таъмини нафақаи хизматчиёни ҳарбӣ», «Дар бораи хизмати давлатӣ», «Дар бораи Асосгузори сулҳу ваҳдати миллӣ – Пешвои миллат» ва ғайра баррасӣ мешаванд.
Ёдрас мекунем ки палатаи поёнии парлумони кишвар санаи 9 декабр аз лоиҳаи қонуни аз ҷониби як гурӯҳи вакилон пешниҳодшуда «Дар бораи Асосгузори сулҳу ваҳдати миллӣ – Пешвои миллат» ҷонибдорӣ намуд, ки ваколати Пешвои миллат, дахолатнопазирии ӯ баъди тарк кардани мансаби президенти Тоҷикистон, таъмини ӯ бо нақлиёт, манзили зист, имтиёзҳои иҷтимоӣ баъди анҷоми муҳлати президентиро муқаррар мекунад.
Мутобиқи меъёрҳои ин қонун, пас аз мансаби президентиро тарк гуфтан Пешвои миллат ҳамчунин барои муроҷиат ба мардуми ҷумҳурӣ, иштирок кардан дар кори чорабиниҳои муҳими давлатӣ ва суханронӣ дар онҳо ҳуқуқ дорад. Ғайр аз ин, дар қонун таъсиси бойгонӣ, китобхона ва осорхонаи Пешвои миллат низ пешбинӣ шудааст.
Барои ҳукми қонунӣ гирифтани қонун, онро бояд палатаи болоии парлумон тасдиқ ва аз ҷониби президент ба имзо расад. Пас аз нашри он дар матбуоти расмӣ қонун мавриди амал қароргирифта шуморида мешавад.
