Кумита оид ба корҳои дин, танзими анъана ва ҷашну маросимҳои миллии назди ҳукумати Тоҷикистон барои имомхатибони масҷидҳои ҷумҳурӣ давраҳои омӯзишии такмили ихтисос оид ба шинохти ифротгароён ва террористон миёни ибодаткунандагони масҷидҳоро баргузор мекунад.
Дар суҳбат бо «Азия-Плюс» роҳбари Раёсати иттиҳодияҳои динии Кумита Ҳусейн Шокиров дар ин робита гуфт, дар доираи ин курсҳои омӯзишӣ намояндагони ташкилотҳои динӣ, Маркази исломии Тоҷикистон ва равоншиносону ҳуқуқшиносон имомхатибонро бо рафтори ифротгароёну террористони имконпазир ҳангоми адои намоз ва дигар ибодатҳо ошно месозанд.
«Ғайр аз ин, ҳамаи имомхатибони масҷидҳои Тоҷикистон аз рафтору кирдори ҷонибдорони мазҳаби мо – мазҳаби сунниҳо хуб огаҳӣ дошта, худиҳоро аз бегона фарқ карда метавонанд», – қайд кард Шокиров.
Ӯ таъкид дошт, ки 2 ҳазору 543 нафар имомхатибон дар давраҳои омӯзишии такмили ихтисоси солҳои 2013-2016 сатҳи дониш ва огаҳии худ дар самтҳои гуногунро такмил додаву баланд бардоштанд.
Ба ҷуз донишҳои динӣ, дар давраҳои омӯзишӣ имомхатибон аз ахлоқу маълумоти зарурӣ барои донистани Конутситутсия ва қонунҳои кишвар низ сабақ гирифтанд.
Ба имомхатибон тавсия дода мешавад, ки бо шахсоне, ки берун аз чаҳорчӯби муқарраркардаи мазҳаби суннӣ намозу мегузоранду ибодат мекунанд, ҷиҳати пешгирӣ суҳбатҳо гузаронанд.
