Сафири Тоҷикистон дар Русия Имомуддин Сатторов рӯзи 28 апрел дар шаҳри Маскав бо раиси Кумитаи иҷроияи ИДМ – Котиби иҷроияи ИДМ Сергей Лебедев дидору гуфтушунид кард.
Бино ба маълумоти хадамоти матбуоти Кумитаи иҷроияи ИДМ, зимни мулоқот пахлӯҳои гуногуни иштироки Тоҷикистон дар равандҳои ҳамгиройӣ дар доираи ИДМ баррасӣ шуда, ба ташкили кори Ҳайати нозирони ИДМ дар омодагӣ ва баргузории раъйпурсӣ оид ба ворид намудани тағйироту иловаҳо ба Конститутсияи Тоҷикистон, ки ба санаи 22 май таъин шудааст, таваҷҷуҳи хосса зоҳир шуд.
Гуфта мешавад, дар ҷараёни суҳбат Сергей Лебедев изҳор доштааст, ки дар маъракаи раъйпурсии Тоҷикистон аз ИДМ ҳудуди 90 нозирон ширкат варзида, то ҳол 24 нозир аз Иттиҳод ба қайд гирифта шудаанд, ки аз Шӯрои Федератсияи Маҷлиси Федералии Русия, Ассамблеяи байнипарлумонии ИДМ ва Кумитаи иҷроияи ИДМ намояндагӣ мекунанд.
Зимнан зикр мегардад, ки бо қарори Шӯрои намояндагони доимии ваколатдори кишварҳои узви Иттиҳод дар назди мақомоти оинномавӣ ва дигар мақомоти ИДМ, ҳайати нозиронро муовини аввали раиси Кумитаи иҷроияи ИДМ Владимир Гаркун роҳбарӣ мекунад.
