Муовини раиси Маҷлиси намояндагони Маҷлиси Олии Тоҷикистон Акрамшо Фелалиев имрӯз доир ба масъалаи ҷараёни амалисозии лоиҳаи Ассотсиатсияи байнулмилалии рушд ва ҳукумати Тоҷикистон «Дар бораи такмили хадамоти обуҳавошиносӣ дар Осиёи Марказӣ» музокирои парлумонӣ баргузор кард.
Котиби матбуотии палатаи поёнии парлумони ҷумҳурӣ Муҳаммадато Султонов ба «Азия-Плюс» дар ин робита иттилоъ дод, ки арзиши умумии лоиҳа 13 млн. доллари ИМА-ро ташкил дода, амалисозии он соли 2012 оғоз ва анҷоми он охири соли 2018 дар назар аст.
Дар музокироти парлумонӣ зикр гардид, ки дар доираи амалисозии лоиҳа қариб дар ҳамаи истгоҳҳои обуҳавосанҷии Тоҷикистон таҷҳизоти замони шӯравӣ бо нав иваз шуда, ҳамаи онҳо бо техникаи муосири компютерӣ ва шабакаи интернет таъминанд.
Дар музокирот бо изҳори таассуф қайд шудааст, ки айни замон музди меҳнати нозирон ва кормандони техникии истгоҳҳои обуҳавосанҷии ҷумҳурӣ аз 270 то 290 сомониро ташкил медиҳад. Дар Тоҷикистон 96 постгоҳи метереологӣ ва 54 истгоҳи обуҳавосанҷӣ фаъолият дошта, дар онҳо 796 кормандон машғули коранд.
Зимнан зикр гардид, ки аз рӯи натиҷаҳои музокироти парлумонӣ ба унвони ҳукумат ва кишварҳову созмонҳои мададрасон як қатор тавсия ва пешниҳодҳо қабул шуданд.
