Имрӯз Президенти Тоҷикистон Эмомалӣ Раҳмон дар арафаи ҷашни бузурги умумимиллӣ 25-умин солгарди Истиқлолияти давлатии Тоҷикистон дар ноҳияҳои пойтахт иншооти таъиноти гуногунро ифтитоҳ карда, бо сокинон суҳбату мулоқоти судманд доир кард.
Бино ба иттилои хадамоти матбуоти сарвари давлат, Эмомалӣ Раҳмон нахуст дар ноҳияи Исмоили Сомонии шаҳри Душанбе бинои нави Донишгоҳи славянии Россияву Тоҷикистонро мавриди баҳрабардорӣ қарор дод.
Гуфта мешавад, барои бунёди иншооти мазкур 50 миллион сомонӣ маблағ сарф шудааст. Бинои таълимӣ аз 3 иморати 5 ошёна иборат мебошад ва барои 1072 нафар донишҷӯ пешбинӣ шудааст.
Сипас президенти мамлакат Эмомалӣ Раҳмон дар маросими мавриди баҳрабардорӣ қарор додани мактаби нави таҳсилоти умумӣ дар маҳаллаи 104-уми шаҳри Душанбе иштирок кард. Тибқи супориши Ҳукумати мамлакат бунёди он дар ҳамкорӣ бо яке аз ширкатҳои бузурги чинии «ТВЕА» барои 2500 ҷойи нишаст ба анҷом расонида шудааст.
Зимни суханронӣ дар ин маросим сарвари давлат таъкид дошт, ки соли ҷорӣ аз буҷети давлат ба соҳаи маориф зиёда аз се миллиард сомонӣ пешбинӣ гардидааст, ки нисбат ба соли гузашта 231 миллион ё 10 фоиз ва дар муқоиса ба даҳ соли пеш, яъне соли 2006 қариб 13 баробар зиёд мебошад.
