Дар ноҳияи Кронштадти шаҳри Санкт-Петербург 4 нафар муҳоҷирони корӣ аз Тоҷикистону Ӯзбекистон ба чоҳ (шахта)-и лифт афтода, қабурғаҳояшон шикаст ва аз сутунмуҳра ҷароҳат бардоштанд, лекин мустақилона пои пиёда барои кумаки тиббӣ шитофтаанд, хабар медиҳад «Фонтанка.ру».
Бино ба маълумоти нашрия, ду тан аз онҳо бо қабурғаҳои шикаста, осеби устухони рон ва сутунмуҳра, ҳамчунин ҳолати сахти ҳарос аз ҷароҳат дарҳол дар шуъбаи эҳёгарии бемористон бистарӣ шуда, як нафари дигар низ бо захми сар ва қабурғаҳои шикаста дар бемористон мондааст. Вазъи нафари чорум начандон вазнин буда, ӯ бистарӣ шуданро рад кардааст.
Гуфта мешавад, муҳоҷирон хабар додаанд, ки ба чоҳи лифт афтодаанд, лекин аз шарҳи ҷузъиёти дигари ҳодиса худдорӣ варзидаанд.
Зимнан зикр мегардад, ки синнусоли муҳоҷирон аз 31 то 38-соларо ташкил дода, ду нафар бародарон зодаи Ӯзбекистон ва ду нафари дигар аз Тоҷикистон мебошанд. Дар Петербург ба корҳои сохтмон машғул будаанд.
Маводи мо бо суроғаҳои news.tj ё asiaplustj.info тариқи браузери Opera (ба кор даровардани VPN лозим аст) қобили дарёфт аст. Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
