Ҷаласаи навбатии Шӯрои миллии муқовимат ба коррупсия дар Тоҷикистон имрӯз, 28-уми январ дар бинои Ҳукумати ҶТ таҳти роҳбарии сарвазири мамлакат Қоҳир Расулзода баргузор шуд.
Дар он аъзои Шӯрои миллии муқовимат ба коррупсия, роҳбарони як қатор вазорату идораҳо, мақомотҳои иҷроияи ҳокимияти давлатии вилояти Суғд ва ноҳияи Рӯдакӣ ширкат варзиданд.
Тибқи иттилои Агентии назорати давлатии молиявӣ ва мубориза бо коррупсияи ҶТ, ин ҷаласаро Қоҳир Расулзода ифтитоҳ карда, сипас ҳисоботи котиби Шӯро – муовини сардори Раёсати мудофиа ва тартиботи ҳуқуқии Дастгоҳи иҷроияи Президенти ҶТ оид ба рафти иҷрои Протоколи ҷаласаи шашуми Шӯро ва Нақшаи кории он барои соли 2019 муҳокима шуд.
Зимнан сарвари Агентии назорати давлатии молиявӣ ва мубориза бо коррупсияи ҶТ Сулаймон Султонзода оид ба ҳолати иҷрои «Стратегияи муқовимат ба коррупсия дар Ҷумҳурии Тоҷикистон барои солҳои 2013-2020» суханронӣ карда, норасоиҳои дар ин самт ҷойдоштаро мавриди баррасӣ қарор дод.
Дар идомаи ҷаласа ҳисоботҳои раисони вилояти Суғд ва ноҳияи Рӯдакӣ вобаста ба ҳолати иҷрои «Стратегияи муқовимат ба коррупсия дар Ҷумҳурии Тоҷикистон барои солҳои 2013-2020» ва андешидани чораҳои дахлдор ҷиҳати бартараф кардани кабудиҳои ҷойдошта шунида шуд.
Бо назардошти масъалаҳои баррасишуда раиси Шӯрои миллии муқовимат ба коррупсия дар Тоҷикистон Қоҳир Расулзода оид ба бартараф кардани камбудиҳои ҷойдошта ба масъулин супоришҳои мушаххас дод.
Дар охири ҷаласа қарорҳои дахлдор қабул шуда, Нақшаи кории Шӯро барои соли 2020 тасдиқ гардид.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
