Дар натиҷаи баҳси ду ҳамсоя дар шаҳри Кӯлоб як нафар кушта шудаву бародари марҳум хонаи муттаҳамро бо трактор тахриб кардааст. Дар пайи ин ҷангҷол як нафар боздошт шудааст. Ин қазияро аз Додситонии шаҳри Кӯлоб ба “Азия-Плюс” тасдиқ карда, гуфтанд, ки тафтишот идома дорад.
Ба иттилои додситонӣ, рӯзи 7-уми феврал дар маҳаллаи 1-уми майи шаҳри Кӯлоб миёни ду ҳамсоя баҳс сар зада, ба муноқиша табдил меёбад. Сабаби ҷанҷол мудохила ба ҳарами хусусӣ гуфта мешавад.
Манобеи “Азия-Плюс” гуфтанд, ки Маҳмуд Маҳмудов, ки ба биносозӣ машғул аст, дар маҳаллаи 1-уми майи шаҳри Кӯлоб ба сохтмони бинои баландошёна оғоз кардаааст.
Ба гуфтаи манобеи мо, кормандони биносоз сангу хоки сохтмонро қисман ба замини хонаи ҳамсоя, ки аз он Алихон Орифов ном мебаранд, рехтаанд. Ин боиси норозигии оилаи Алихон мешавад ва онҳо хоҳиш мекунанд, ки сангу хоки зиёдатиро аз ҳудуди замини онҳо бардоранд.
Кироякорони сохтмонсоз масъаларо ба дӯши бародари Маҳмуд Маҳмудов – Қурбоналӣ Маҳмудов мегузоранд, вале ӯ ба ин эътироз беэътиноӣ мекунад.
Дар натиҷа, баҳси лафзӣ сар зада, ба зӯроварӣ табдил ёфтааст. Чанд шоҳиди ҳодиса имрӯз ба “Азия-Плюс” гуфтанд, ки пас аз таноқузи лафзӣ писари бузурги Алихон Орифов ба рӯйи Қурбоналӣ Маҳмудови 56-сола муште мезанад, ки ба замин афтода, аз ҳуш меравад. Ӯро шаби 7-уми феврал дар ҳолати вазнин ба Беморхонаи вилоятии шаҳри Кӯлоб бурда, бистарӣ кардаанд.
ИЗОБРАЖЕНИЕ
Пас аз хабардор шудан аз вазъият, ба гуфтаи манобеи “Азия-Плюс”, бародари ҷабрдида Маҳмуд Маҳмудов бо як навъ трактор, ки бели механикӣ дорад (механическая лопата), хонаи ҳамсояро қисман тахриб кардааст.
Аксҳои макони ҳодиса ва хонаи қисман вайроншуда дастраси “Азия-Плюс” шуд.
Ин ҳодисаро имрӯз, 9-уми феврал, аз Додситонии шаҳри Кӯлоб ба “Азия-Плюс” тасдиқ карда, гуфтанд, ки парвандаи ҷиноӣ боз кардаанд. Аз додситонӣ ному насаби Қурбоналӣ Маҳмудовро тасдиқ карда, вале ҳувияти ҳамсояи дигарро ошкор накарданд.
Ба гуфтаи ҳамсӯҳбати мо аз Додситонии шаҳри Кӯлоб, дар пайи ин қазия як писари Орифов боздошт шудааст ва як тани дигар дар кофтуков қарор дорад.
Субҳи имрӯз, 9-уми феврал, аз Беморхонаи вилоятии шаҳри Кӯлоб ҳам ба “Азия-Плюс” гуфтанд, ки Қурбоналӣ Маҳмудов дар беморхона бо сабаби ҷароҳатҳои вазнин фавтидааст.
Як манбаъи дигар аз шаҳри Кӯлоб ба мо гуфт, ки намози ҷанозаи Маҳмудов пас аз намози пешин дар масҷиди ҷомеи ҳамин шаҳр, ки бо номи масҷиди Мулло Ҳайдар маъруф аст, баргузор шуд ва ӯро ба хок супориданд.
Танҳо яке аз пайвандони Маҳмудовҳо фавтидани Қурбоналӣ Маҳмудовро ба “Азия-Плюс” тасдиқ карда, вале “бинобар сабаби таъзия доштан” ҷузъиёти ҷанҷолро нагуфт.
Инчунин, назари ҷониби Орифовҳо ҳам ба мо маълум нест.
Дар Тоҷикистон бори аввал нест, ки хабарҳои баҳси лафзии ба муноқиза печида ва дар пайи он касе осеб дида ё фавтида расонаӣ мешавад. Моҳи январи соли равон дар пайи ҷанҷоли як гурӯҳ ноболиғон хонандаи синфи 10-и мактаби рақами 78-и Душанбе кушта шуд.
Аз ин пештар ҳам, моҳи ноябри соли 2025 пулиси Душанбе ҷузъиёти ҷанҷоли як гурӯҳ ноболиғонро дар ноҳияи Фирдавсӣ, ки дар пайи он як наврас кушта ва як тани дигар маҷруҳ шудааст, расонаӣ карда буд. Ин ниҳод он вақт гуфта буд, ки ҳодиса рӯзи 9-уми ноябр дар пайи нофаҳмиҳои лафзӣ дар шабакаҳои иҷтимоӣ рух додааст.
