Аввалин қатораи санҷишии борбар аз Чин ба Тоҷикистон фиристода шуд, хабар медиҳад, ширкати муштараки Чину Ӯзбекистон "UTK International Logistics Co. Ltd".
Ба иттилои манбаъ, "ин иқдом дар доираи созишномаҳои таҳкиму густариши ҳамкории минтақавӣ ва рушди робитаҳо, ки дар вохӯрии сарони кишварҳои Тоҷикистону Қирғизистон ва Ӯзбекистон соли 2025 дар Душанбе ба имзо расидааанд, қадами амалӣ аст".
Қатора аз 8 "контейнер" иборат аст, ки дар онҳо маҳсулоти истеъмолии мавриди ниёзи мардум ва техникаи сохтмонӣ бор шудааст.
Қатора аз истгоҳи Ланчжоу тавассути долони мултимодалии нақлиётии “Чин – Қирғизистон – Ӯзбекистон – Тоҷикистон” ба сафар баромада, нуқтаи таъиноташ истгоҳи "Душанбе-2" муқаррар шудааст.
Масофаи умумии хатсайр зиёда аз 3 ҳазору 500 километр ва вақти транзитии расонидани бор 18-20 рӯзро ташкил медиҳад.
"UTK International Logistics Co. Ltd" корхонаи муштаракест, ки моҳи июли соли 2025 аз ҷониби Ӯзбекистон ва Чин таъсис дода шудааст. Фаъолияти ширкат ба муттаҳид сохтани бору маҳсулот ва рушди ҳамлу нақл тариқи роҳи оҳан ва мултимодалӣ байни Чин ва кишварҳои Осиёи Марказӣ мутамарказ гардонида шудааст.
Қобили зикр аст, ки Чин шарики асосии тиҷоратии Тоҷикистон маҳсуб меёбад. Соли 2025 дар гардиши моли дуҷониба он бори аввал аз Русия пеш гузашт.
Бино ба маълумоти омори расмии Тоҷикистон, ҳаҷми гардиши молу маҳсулоти Тоҷикистону Чин дар соли 2025 ба 2 млрд 850 млн доллар расид, ки 46% зиёдтар нисбат ба соли 2024 аст.
Аз ҷумла маблағи содироти молу маҳсулоти Тоҷикистон ба Чин 524 млн доллар ва воридот аз Чин ба Тоҷикистон – 2 млрд 326 млн долларро ташкил дод.
Ҳиссаи Чин дар гардиши молу маҳсулоти хориҷии Тоҷикистон ба 26,4% ва ҳиссаи Русия – ба ҳудуди 23% (2,5 млрд доллар) баробар аст.
Тоҷикистон аз Чин қисмати назарраси молу маҳсулоти истеъмолӣ, саноатӣ ва ашёи хому таҷҳизоти техникии таъиноти дигарро мехарад.
Молу маҳсулоти содиротӣ аз Тоҷикистон ба Чин асосан аз ашёи хом ва захираҳои табиӣ иборат мебошад.
Қобили зикр аст, ки Тоҷикистон бо Чин хатсайри мустақими ҳавоӣ дошта, лекин танҳо қисмате аз боркашонӣ байни кишвраҳо тариқи ин самт сурат мегирад. Ин ба вазъияти бади роҳи Душанбе – Хоруғ – Қулма (сарҳади Чин) рабт дорад, ки интиқоли молу маҳсулотро тариқи роҳи мошингард душвор мегардонад.
