Ҳукумати Тоҷикистон меъёри боҷҳои воридотии гумрукӣ барои серунсоз ва ё ҳавосоз (кондитсионер), қандил (люстра) ва дигар таҷҳизоти барқии равшанидиҳандаро боло бурд. Ин меъёр аз 1-уми июли соли 2026 мавриди амал қарор мегирад.
Қарори ҳукумат дар ин бора таҳти №209 рӯзи 28-уми апрели соли 2026 қабул шудааст. Тибқи он барои навъҳои ҷудогонаи дастгоҳҳо барои серунсоз меъёри боҷи гумрукӣ аз 5 то 15 евро (барои 1 дона) боло меравад.
Сухан дар бораи серунсозҳои деворӣ, сақфӣ, фаршӣ, назди тирезаҳо, инчунин ҳавосозҳои ҷудогонаи саноатӣ бо танзими худкори ҳарорат ва намнокӣ меравад.
Ба ин номгӯй, навъҳои алоҳидаи чароғҳо, ки барои истифода бо манбаъҳои диодии рӯшноӣ, инчунин маснуот аз пластики, сафол, шиша ва дигар мавод шомил мешаванд.
Дар қарор сабаби болоравии меъёрҳо зикр намешавад. Вале маъмулан чунин тадбирҳо “барои танзими воридот”, “ҳимояи бозори дохилӣ”, “дастгирии истеҳсолкунандагони маҳаллӣ” ё “воридоти маблағ ба буҷет” рӯйи даст гирифта мешаванд.
Болоравии боҷҳо метавонад хароҷоти воридкунандагонро зиёд кунад, вале таъсири он ба нархҳои ниҳоӣ барои истеъмолгарон, ба арзиши хариди маҳсулот, логистика, қурби асъор, хароҷоти нигаҳдорӣ дар анбор ва нархгузории фурӯшандагон вобаста аст.
Маблағи боҷи гумрукӣ бо евро бо асъори миллӣ тибқи қурби Бонки миллии Тоҷикистон дар рӯзи қабули эъломияи гумрукии бор, ба мақомоти гумрук пардохт мешавад.
