Дар Тоҷикистон ҳудуди 485 ҳуҷра дар меҳмонхонаҳои сатҳи байнулмилалӣ мавҷуд аст. Бинобар сабаби пешниҳоди маҳдуд, нарх дар онҳо баланд аст.
Як таҳқиқоте , ки гурӯҳи IQ KNOWLEDGE BASE-и ширкати Commonwealth Partnership гузаронидааст, нишон медиҳад, ки дар Тоҷикистон 485 ҳуҷраи шабакаи байнулмилалии меҳмонхонаҳо мавҷуд аст ва ин камтарин нишондиҳанда миёни кишварҳои Осиёи Марказӣ будааст.
Дар минтақаи Осиёи Марказӣ ба чунин шабакаҳо Hilton, Hyatt, Marriott, Sheraton, Accor, Wyndham Hotels & Resorts ва IHG мансубанд.
Тоҷикистон аз ҳамсояҳо қафо мемонад
Соли 2025 ҳаҷми умумии фонди фармоишии ҳуҷраҳо дар Осиёи Марказӣ ба 12 743 рақам расида, ин нишондиҳанда дар муқоиса бо соли 2020 қариб 90% зиёдтар мебошад.
Аз ҳама бештар чунин ҳуҷраҳо дар Қазоқистон – ҳудуди 7,2 ҳазор адад ба қайд гирифта шудааст. Ин тақрибан 57%-и ҳамаи фонди фармоишии ҳуҷраҳоро дар минтақа ташкил медиҳад.
Дар зинаи дуюм Ӯзбекистон қарор дорад. Аз соли 2020 фонди ҳуҷравии кишвар ба андозаи 272% афзуда, ба 4473 ҳуҷра расидааст.
Қирғизистон ҳоло бозори начандон бузург буда, 585 ҳуҷраи фармоишӣ дорад.
Дар бораи Туркманистон маълумот дастрас нест.
Чаро нархҳо дар Тоҷикистон баланд аст?
Дар мавод зикр мешавад, ки чунин нархҳо на ба теъдоди зиёди сайёҳон, балки норасоии меҳмонхонаҳои босифат вобаста аст. Вақте ки меҳмонхонаҳои байнулмилалӣ каманд, онҳо метавонанд нархҳои нисбатан баландро нигоҳ доранд. Яъне бозори меҳмонхонадорӣ дар Тоҷикистон нисбатан маҳдуд ва қамрақобат аст.
Масалан, дар Тоҷикистон ҳуҷра барои 1 нафар дар як шабонарӯз чунин нарх дорад:
Hilton Dushanbe — от 155 то 482 доллар;
Hyatt Regency Dushanbe — аз 180 то 456 доллар.
Минтақа аз сайёҳии арзон дур мешавад
Дар маҷмӯъ, Осиёи Марказӣ тадриҷан симои сайёҳии худро тағйир медиҳад. Агар қаблан минтақа бештар ҳамчун самти сафарҳои буҷетӣ, пиёдагардӣ, кӯҳҳо ва хонаҳои меҳмонӣ қабул мешуд, ҳоло кишварҳо зерсохтори нисбатан бароҳатро рушд медиҳанд.
Шабакаҳои байналмилалии меҳмонхонаҳо на танҳо ба пойтахтҳо, балки ба минтақаҳои сайёҳӣ низ ворид мешаванд: Самарқанд, Бухоро, Иссиқкӯл, осоишгоҳҳои кӯҳӣ ва марказҳои нави корӣ.
Қазоқистон ба бахши корӣ ва дараҷаи беҳтарин майл мекунад. Дар Остона ва Алмато ҳамоишҳои байнулмилалӣ, нишаст ва чорабиниҳои бузурги тиҷоратӣ баргузор мешаванд.
Ӯзбекистон сайёҳии фарҳангиро рушд медиҳад. Самарқанд, Бухоро ва Тошканд на танҳо ба самти сайру саёҳати кӯтоҳ, балки барои истироҳати тӯлонӣ ва бароҳат табдил меёбанд.
Қирғизистон тадриҷан аз симои сайёҳии экологӣ ва истироҳатӣ табдил меёбад. Дар Бишкек аллакай Sheraton, Hyatt Regency ва Novotel фаъолият мекунанд.
