Узви шӯрои сиёсӣ ва мушовири раиси Ҳизби наҳзати исломии Тоҷикистон оид ба масоили фарҳангӣ Мирзомуҳаммади Навид ба нишони эътироз аз сиёсати раиси кунунии ҳизб Муҳиддин Кабирӣ аз сафи ҳизб хориҷ шуд.
Дар мусоҳиба ба хабарнигори ОИ «Азия-Плюс» М. Навид изҳор кард, ки ӯ ҳанӯз аз замони ҷанги шаҳрвандӣ узви ин ҳизб буда, имрӯз ҳам дар бораи сиёсати ҳизб чизи баде гуфта наметавонад. Сафҳои ҳизбро тарк гуфтани ӯ танҳо ба сиёсати пешгирифтаи раиси ҲНИТ Муҳиддин Кабирӣ марбут аст.
«Ақидаву мавқеъи ман роҷеъ ба ин ё он масоил, ки ба фаъолияти ҳизб дахл дошт, аз ҷониби роҳбари вақти он Муҳиддин Кабирӣ ба инобат гирифта намешуд. Метавон гуфт, ки ӯ ба он аҳамият намедод. Аз ин рӯ, ман тасмим гирифтам, ки сафҳои ин ҳизбро тарк созам», – гуфт М. Навид.
Собиқ узви ҲНИТ таъкид кард, ки аризаи хориҷ шудан аз сафҳои ҳибро ӯ ҳанӯз 2 моҳ пеш навишгта будааст, вале дар тамоми ин муддат М. Кабирӣ ҳатто ба сабаби чунин тасмимгирӣ таваҷҷӯҳе зоҳир насохтааст.
Дар шарҳи аз сафҳои ҲНИТ хориҷ шудани узви шӯрои сиёсӣ, муовини раиси ҳизб Маҳмадалии Ҳайит изҳор дошт, ки ба узвият пазируфтану хориҷ шудани як нафар аз сафҳои ҳизб ҳодисаи маъмулӣ дар фаъолияти ҳизб аст. «Ғайр аз ин, то ҷое ман медонам, сафи ҳизбро тарк гуфтани М. Навид ба таъини ӯ ба мансабе дар Китобхонаи миллии Тоҷикистон низ вобаста аст», – афзуд вай.
Дар ҳамин ҳол, худи М. Навид мегӯяд, ӯ муддати панҷ соли ахир ба ҳайси роҳбари Маркази тоҷикшиносӣ дар назди Китобхонаи миллӣ ифои вазифа мекунад.
«Ман ҳамчун шахси эҷодкору аҳли қалам ба ҳеҷ вазифаву мансабе ниёз надорам», – афзуд М. Навид.
Ёдрас мекунем, ки ахири моҳи сентябри соли равон дар шаҳри Душанбе анҷумани навбатии ҲНИТ баргузор мешавад. Дар он раис ва раёсати нави ҳизб интихоб карда мешавад.
