Айбдоркунандаи давлатӣ аз додрас барои хабарнигори Би-Би-Сӣ 5 соли зиндон ва минбаъд бо истифодаи қонуни афв озод кардани ӯро тақозо кард.
Зимни музокироти ҷонибҳо айбдоркунандаи давлатӣ – додситон Нозир Абдураҳмонов дар ин бора дархост намуда, айбдор донистани Усмонов мутобиқи моддаҳои 36, қ. 5 ва 307, прим 3, қ. 2-и КҶ-ро хоҳиш кард.
Амоо ҷониби ҳимояи журналист комилан мухолифи ин айбдоркунӣ буда, тасдиқи бегуноҳии журналистро талаб кард.
Адвокати журналист Файзинисо Воҳидова изҳор кард, ки боздошти Усмонов ва тамоми амали нисбати ӯ анҷомдода ҳангоми тафтишоти пешакӣ ғайриқонунӣ буданд.
«Дар ҷараёни тафтишот мо ҳама шоҳиди он будем, ки ҷиҳати узвитяи журналист ба созмони ифротгарои «Ҳизб-ут-Таҳрир» ва мусоидати ӯ дар содир намудани ҷинояти мазкур ҳеҷ далеле оварда нашуд. Гузашта аз ин, нисбат ба журналист рафтори ношоям содир гардида, дар ҷисми ӯ пайи латукӯб ва шиканҷа пас аз боздошташ дар санаи 13-уми июн намудор буд», – гуфт адвокат.
Воҳидова ҳамчунин аз додгоҳ дархост кард, ки нисбат ба сардори Кумитаи давлатии амнияти миллии ноҳияи Бобоҷон Ғафуров Эраҷ Давлатов мутобиқи моддаҳои 358 (Боздошт ва ҳабси ғайриқонунӣ) ва 316 (Баромадан аз ҳадди ваколатҳои мансабӣ)-и КҶ ҶТ парвандаи ҷиноӣ боз карда шавад.
Парвандаи ҷиноӣ нисбат ба Ӯрунбой Усмонов бо парвандаи ҷиноии чаҳор нафари гумонбаршуда ба узвият дар созмони «Ҳизю-ут-таҳрир» ба як истеҳсолот ҳамроҳ карда шуд, зеро нахуст айбдоршавандагон муқобили Усмонов баёнот дода, сипас ҳангоми сӯҳбати рӯбарӯ ва баъдтар дар ҷаласаи додгоҳӣ (16-уми август) аз он даст кашиданд. Онҳо ба гуноҳи худ иқрор шуда, ба додгоҳ изҳор карданд, ки узви созмони «Ҳизб-ут-таҳрир» мебошанд.
Ёдрас мекунем, ки санаи 13-уми июни соли ҷорӣ Усмонов ба иттиҳоми узвият дар созмони фаъолияташ мамнӯъи «Ҳизб-ут-таҳрир» боздошт гардида, сипас ин айбдорӣ бекор ва айни замон ӯ барои ба мақомоти ҳукуматӣ хабар надодан дар бораи фаъолияти созмони мамнӯъ айбдор карда мешавад.
Пас аз як моҳ хабарнигор бо шарти тарк накардани қламрави маҳалли зист озод карда шуд. Би-Би-Сӣ бар ин назар аст, ки айбҳои нисбати Ӯрунбой Усмонов пешниҳодшуда бепоя буда, ба журналистикаи касбӣ ва озодии баён дар Тоҷикистон таҳдиди ҷиддӣ мекунанд.
