Дар Ню-Йорк мулоқоти Вазири корҳои хориҷии Ҷумҳурии Тоҷикистон Ҳамрохон Зарифӣ бо муовини Дабири кулли СММ ва муовини Маъмури Барномаи рушди СММ Ребекка Гринспан баргузор гардид.
Тавре аз департаменти иттилооти Вазорати корҳои хориҷии ҷумҳурӣ иттилоъ доданд, зимни мулоқот раванди татбиқи лоиҳаҳои Барномаи рушди СММ дар Тоҷикистон, дурнамои ҳамкориҳо бо ниҳоди мазкур ва лоиҳаҳои фаромарзӣ миёни Тоҷикистону Афғонистон мавриди баррасӣ қарор гирифтанд. Ҳамрохон Зарифӣ аз хонум Гринспан ҷиҳати боздид аз Ҷумҳурии Тоҷикистон бо мақсади шиносоӣ бо фаъолияти дафтари Барномаи рушди СММ дар кишвар ва муҳокимаи ҳамкориҳои минбаъда бо ниҳодҳои дахлдори ҷумҳурӣ даъват ба амал овард.
Ҳамчунин Вазири корҳои хориҷии Ҷумҳурии Тоҷикистон Ҳамрохон Зарифӣ бо Вазири корҳои хориҷии Ҷумҳурии Словения Самуэл Жбогар мулоқот намуд.
Дар мулоқот масъалаҳои равобити дуҷониба ва ҳамкориҳо дар доираи созмонҳои байналмилалӣ мавриди баррасӣ қарор гирифтанд. Ҳамчунин, зимни мулоқот дар мавриди вазъ дар минтақаи Осиёи Марказӣ ва Афғонистон табодули назар сурат гирифт.
