Душанбе. 20-уми август. ОИ «Азия-Плюс» – Аз Сарраёсати хадамоти сӯхторнишонии Вазорати умури дохилии ҷумҳурӣ ба ОИ «Азия-Плюс» хабар доданд, ки сабабҳо ва ҳаҷми хисороти сӯхтори бозори «Корвон», ки шаби 13-уми август рух дод, то ҳол муайян карда нашудаанд.
«Мутахассисони раёсат дар ин самт корҳои мушаххасеро анҷом доданд, вале мутаасифона, то ҳол ба натиҷаи муайяне нарасидаанд», – изҳор дошт манбаъ.
«Аксари зарардидагон аз ҳамкорӣ бо мақомот саркашӣ мекунанд», – таъкид сохт сарчашма ва афзуд, ки сабабҳои сар задани сӯхтор рӯзҳои наздик муайян хоҳанд шуд, зеро тафтишоти қазияи мазкур таҳти назорати Вазорати умури дохилии кишвар қарор дорад ва соҳибкорони зарадида низ хоҳони ҳарчи зудтар ошкор сохтани сабаҳои сӯхтор мебошанд.
Ёдрас мекунем, ки тақрибан соатҳои 1-и шаби 13-уми августи соли равон дар макони савдои тоҷирони яклухтфурӯши бозор сӯхтор сар зад. Баъди чанд дақиқа якчанд гурӯҳҳои сӯхторнишонӣ ба ҷои ҳодиса ҳозир шуда, дар муддати як соат оташро хомӯш карданд. Майдони сӯхтор 2 ҳазору 100 метри мураббаъро ташкил дод. Касе осеб надид. Дар ҳамин ҳол, соҳибкорон мегӯянд, ки сӯхтор 60 нуқтаи фурӯш ва 2 ҷойгоҳи калони фурӯшгоҳро (ангар) нобуд кардааст.
Аз оғози фаъолияти бозор (соли 2002) то инҷониб дар ин маркази тиҷорат якчанд ҳодисаи сӯхтор рух доданд.
