Душанбе. 27-уми июл. «Азия-Плюс» — | Дар Агентии назорати маводи нашъаовари назди президенти Тоҷикистон бо тартиби муқаррашудаи қонунгузорӣ дар оташдонҳои махсус як миқдор маводи мухаддир нобуд карда мешавад.
Тавре ба ОИ «Азия-Плюс» аз маркази робита бо ҷомеаи агентии мазкур иттилоъ доданд, дар ҳузури комиссияи иборат аз кормандони мақомоти судӣ ва дигар мақомоти ҳифзи ҳуқуқу рӯзноманигорон беш аз 197 кило маводи мухаддир, аз ҷумла зиёда аз 11,5 кило героин, 54 кило афюн ва наздики 110 кило маводи нашъаовари гурӯҳи каннабис сӯзонида хоҳад шуд.
Бино ба иттилои манбаъ, маводи мухаддири нобудшуда ба сифати далели шайъӣ дар 34 парвандаи ҷиноӣ истифода гардида, аз рӯи онҳо ҳукми додгоҳ содир шудааст.
Ёдрас мекунем, ки дар муддати 12 соли фаъолияти Агентии назорати маводи нашъаовари назди президенти Тоҷикистон дар оташдонҳои махсуси агентӣ зиёда аз 13,5 тонна маводи нашъаовар нобуд карда шуд.
