– Баъзе овозаҳо атрофи бо истифода аз имконоти техникии студияи телевизионии шаҳри Тошканд аз ҷониби кормандони телевизиони Ӯзбекистон мустақиман пахш шудани ҷараёни Иҷлосияи XVI-уми Шӯрои Олии Тоҷикистон асоси воқеӣ надоранд, – изҳор дошт ба ОИ «Азия-Плюс» журналисти маъруфи тоҷик, он замон сармуҳаррири телевизионии вилоятии ТВ «Ленинобод» Илҳоми Ҷамолиён.
Ба қавли вай, тамоми маводи иҷлосия аз ҷониби кормандони шабакаи телевизиони ТВ «Ленинобод» таҳия гардида, сипас ин мавод ба ихтиёри телевизиони марказии Тоҷикистон гузошта мешуд.
«Изҳороти чанде аз сиёсатмадорон бобати мустақиман пахш шудани ҷараёни иҷлосия низ бепояанд, зеро рафти иҷлосия нахуст дар Қасри Арбоб сабт шуда, дар студияи телевизиони Хуҷанд таҳия ва сипас ба Душанбе фиристода мешуд», – гуфт рӯзноманигор.
Илҳоми Ҷамолиён таъкид дошт, ки вазъи сиёсии он замон дар Душанбе ва мушкилоти убури ағбаҳо имкон намедоданд, ки таҷҳизоти муосири техникӣ ва мутахассисон аз Душанбе ба Хуҷанд фиристода шаванд.
«Ба телевизиони вилоятӣ яке аз муовинони Кумитаи телевизион ва радиои ҷумҳурӣ ба сифати мушовир фиристода шуда буд ва мо кӯшиш мекардем, ки ҷараёни пурраи иҷлосияро намоиш дода, оид ба тамоми рӯйдоди атрофи он гузоришҳо таҳия созем ва ба назарам, мо ба ин муваффақ ггардидем», – афзуд номбурда.
