Сокини шаҳри Хоруғ Димон Ашӯров дар Чин боздошт ва ба Тоҷикистон фиристода шуд.
Димон Ашӯров тобистони соли 2012 дар Хоруғ ба гумони даст доштан дар қаллобии содирнамуда дар соли 2004 боздошт шуда, зимни кӯшиши фирор худро аз ошёнаи сеюми бинои Раёсати ВКД ба замин меафканад ва бар асари он ду пояш мешиканад.
Ба гуфтаи Ҳайрат Ашӯров, бародари ӯ, пас аз ин Димон Ашӯров якчанд ҷарроҳиро паси сар намуда, раводид ба даст меоранд ва ҷиҳати табобат ба Чин раҳсипор шудаанд.
«Кормандони Хадамоти муҳоҷират ба беморхона омада, шиносномаҳои моро гирифта, сипас шиносномаи маро баргардониданд ва ман ба Хоруғ омадам, вале шиносномаи бародарамро барнагардонида буданд», – гуфт ӯ.
Номбурда изҳор кардааст, ки ба онҳо маълум шудааст, ки бародарашро ба фирор низ муттаҳам намуда, аз беморхонаи Чин ба Душанбе фиристодаанд. «Ба мо маълум нест, ки чаро ӯро ба фирор муттаҳам мекунанд, зеро ӯ расман раводид гирифта буд», – – изҳори тааҷҷуб кардааст вай.
Дар ҳамин ҳол, тибқи баъзе маълумот, Д.Ашӯров ба сафи гурӯҳҳои ҷиноятпешае, ки тобистони соли равон дар рӯйдодҳои Хоруғ ба нерӯҳои ҳукуматӣ муқовимати мусаллаҳона нишон доданд, шомил будааст ва ҳарчанд ҳукуматдорон эълон дошта буданд, ки нисбати афроди ихтиёран аслиҳаашонро супурда парвандаҳои ҷиноӣ боз намешаванд, наздикони Д.Ашӯров бар ин назаранд, ки ӯро маҳз бо ҳамин сабаб боздошт кардаанд.
Ба қавли онҳо, айбномаи гумонбарӣ ба қаллобӣ нисбати ӯ беасос аст, зеро он замон оид ба ин масъала созиш ҳосил гардида, ғайр аз ин, пас аз он якчанд қонуни афв қабул шуд ва ин парванда бояд дигар мавриди баррасӣ қарор нагирад.
