Моҳи феврали соли равон ҳаҷми интиқоли маблағҳои пулӣ ба Тоҷикистон 180,3 млн. доллари ИМА-ро ташкил додааст, ки нисбат ба ҳамин моҳи соли гузашта 9% зиёдтар аст. Дар ин бора дар гузориши «Мониторинг ва огоҳии барвақтӣ дар Тоҷикистон» («Мониторинг и раннего оповещения в Таджикистане»), ки ҳар моҳ аз ҷониби Вазорати рушди иқтисод ва савдои ҷумҳурӣ таҳия мегардад, иттилоъ дода шуда, ғайрирасмӣ будани маълумоти мазкур зикр мегардад.
Моҳи январи соли ҷорӣ ҳаҷми интиқоли маблағҳои пулӣ ба Тоҷикистон 178,8 млн. доллари ИМА-ро ташкил додааст. Ҳамин тариқ, дар ду моҳи аввали соли равон ба ҷумҳурӣ ҳудуди 360 млн. $ маблағ ворид шудааст.
Дар гузориш таъкид мегардад, ки аз афзоиши ҳаҷми интиқоли маблағҳои пулӣ интизорӣ меравад, зеро мавсими муҳоҷирати корӣ наздик омада, мутаносибан шумори муҳоҷирон низ бештар мегардад, ки он ба ҳаҷми ин маблағҳо бевосита таъсир мегузорад.
Тибқи маълумоти ғайрирасмӣ, соли гузашта ҳаҷми интиқоли маблағҳои пулӣ ба Тоҷикистон 3 млрд. 595,2 млн. доллари ИМА-ро ташкил додааст. Ин ҳаҷм қариб 48%-и Маҷмӯи маҳсулоти дохилӣ (ММД)-и кишвар дар соли 2012-ро ташкил медиҳад, ки соли гузашта ба зиёда аз 36,1 млрд. сомонӣ (ҳудуди 7,6 млрд. $) баробар буд.
Аз рӯйи ҳаҷми интиқоли маблағҳои пулии шахсони воқеӣ аз Русия дар соли гузашта Тоҷикистон мақоми дуввумро ишғол карда, дар ин давра танҳо шаҳрвандони Ӯзбекистон аз тоҷикон бештар маблағ ба ватан фиристодаанд.
Бино ба маълумоти Бонки марказии Русия, соли гузашта ҳаҷми умумии интиқоли маблағҳои пулии шахсони воқеӣ аз Русия ба Тоҷикистон
3 млрд. 651 млн. доллари ИМА-ро
ташкил додааст.
Соли гузашта маблағи пулии аз ҳама бештарро шаҳрвандони Ӯзбекистон аз Русия ба ватан фиристодаанд, ки он ба 5 млрд. 693 млн. доллари ИМА баробар аст. Мақоми сеюм дар ин рӯйхатро бо интиқоли 3 млрд. 162 млн. $ Украина касб кардааст. Маблағи умумии соли гузашта аз Русия ба кишварҳои дигар интиқолшуда ҳудуди 49 млрд. доллари ИМА-ро ташкил додааст.
Дар ҳамин ҳол, дар гузориш бо такя ба маълумоти Хадамоти муҳоҷирати назди ҳукумати ҶТ зикр мегардад, ки давоми моҳҳои январ-фервали соли ҷорӣ ҳудуди 153 нафар шаҳрвандони ҷумҳурӣ қаламрави Тоҷикистонро тарк намуда, каме бештар аз 100 ҳазор нафар ба ватан баргаштаанд.
