Прокуратураи вилояти Суғд нисбати ду нафар маҳбуси муассисаи ислоҳии шаҳри Хуҷанд Садриддин Тошев маъруф бо Қорӣ Садриддин ва Суннатулло Ризоев мутобиқи моддаҳои 33, қ 2
(
Кирдорҳое, ки кори ҷойҳои маҳрумият аз озодиро номураттаб месозанд) ва 346, қ. 2 (Дидаю дониста расонидани хабари бардурӯғ)-и КҶ ҶТ парвандаи ҷиноӣ боз намуд.
Чӣ тавре ки адвокат Файзинисо Воҳидова ба ОИ «Азия-Плюс» хабар дод, пешниҳоди маълумоти бардурӯғ ва навори видеоии сохташуда ба ВАО, аз ҷумла сомонаи ОИ «Азия-Плюс» ва радиои «Озодӣ» ба кушодани ин парванда асос шудааст.
«Прокуратура бар ин назар аст, ки маҳкумшудагон барқасдона якдигарро лату кӯб карда, ҷароҳатҳои онро дар навори видеоӣ сабт кардаанд, то ки бо ин роҳ маъмурият ва кормандони муассисаи ислоҳиро мутааҳам созанд», – гуфт Воҳидова ва бо ишора ба баёноти аз ӯ гирифта дар бораи ифшо накардани маводи тафтишот, аз пешниҳоди маълумоти дигар дар ин хусус худдорӣ кард.
Сардори муассисаи ислоҳии шаҳри Хуҷанд Диловар Арабов далели оғози парвандаи ҷиноӣ нисбати ду нафар маҳбусонро ба ОИ «Азия-Плюс» тасдиқ намуда, таъкид дошт, ки дар давраи тафтишоти пешакӣ онҳо ба тавқифгоҳи муваққатии №2-и шаҳри Хуҷанд гузаронида шудаанд.
Тошев ва Ризоев дар қатори як гурӯҳ маҳбусон тирамоҳи соли гузашта пас аз марги маҳбус Ҳамза Икромзода аз муассисаи ислоҳии №1-и Душанбе ба муассисаи ислоҳии шаҳри Хуҷанд интиқол дода шуданд.
