Тафтиши парвандаи ҷиноии марги Исмонбой Боев, ки соли 2010 зимни боздошт эҳтимолан бар асари истифодаи шиканҷа фавтида буд, дубора идома меёбад.
Имрӯз суди шаҳри Хуҷанд шикояти падари фавтида Ҷӯрабой Бобоевро нисбати шахсони мансабдори прокуратураи вилояти Суғд қисман қонеъ намуд.
Ба гуфтаи адвокати хизматгузориаш аз ҷониби Маркази мустақили ҳифзи ҳуқуқ пешниҳодшуда Абдураҳмон Шарифов, суд боздошти тафтиши парвандаи мазкурро ғайриқонунӣ эътироф намуда, онро барои тафтиши такрорӣ ба прокуратураи вилояти Суғд ирсол намуд.
«Бо хоҳиши мо суд ба муассисаҳои тиббии шаҳрҳои Исфараву Конибодом, ки ба гумонбаршудагон Фирдавс Шокиров ва Манучеҳр Акбаров дар бораи муроҷиаташон ҳанӯз то боздошти тафтиши парванда муроҷиат кардаанду бо вазъи муътадил муассисаро тарк карданд, маълумотнома додааст, дархост ирсол намуд», – иброз дошт ӯ.
«Далели асосии шикояти Бобоев дар он ифода меёбад, ки боздошти тафтиши парванда ғайриқонунӣ сурат гирифта, мақоми ин афрод на айбдоршаванда, балки гумонбаршудагон буда, мутобиқи қонун боздошти тафтиши парванда танҳо нисбати айбдоршавандагон амалӣ мегардад», – гуфт Шарифов.
Қобили зикр аст, ки моҳи марти соли 2010 шуъбаи тафтишоти прокуратураи вилояти Суғд аз рӯи далели марги боздоштшуда Исмонбой Бобоев парвандаи ҷиноӣ боз кард. Дар содир намудани ҷинояти мазкур кормандони Раёсати мубориза бо ҷинояткории муташаккили вилояти Суғд Фирдавс Шокиров ва Манучеҳр Акбаров гумонбар дониста мешаванд.
Дар таърихи 25-уми июни соли 2010 бинобар сабаби бемории гумонбаршудагон баррасии парвандаи ҷиноии мазкур боздошта шуд. Баъди чандин маротиба шикоят бурдани Ҷӯрабой Бобоев ба Прокуратураи генералӣ, моҳи октябри соли 2010 тафтиши парвандаи ҷиноии мазкур дубора барқарор карда шуд, аммо бо қарори муфаттиши прокуратураи вилояти Суғд аз 30-юми октябри соли 2012 бар асоси бемории гумонбаршудагон Шокиров ва Акбаров баррасии парванда боз мутаваққиф гардид.
Санаи 11-уми апрели соли ҷорӣ дар суди шаҳри Хуҷанд
баррасии шикояти Ҷӯрабой Бобоев,
падари Исмонбой Бобоев нисбати шахсони мансабдори прокуратураи вилояти Суғд оғоз гардид.
Исмонбой Бобоев рӯзи 19-уми феврали сои 2010 аз ҷониби кормандони Раёсати мубориза бо ҷинояткории муташаккили вилояти Суғд Манучеҳр Акбаров ва Фирдавс Шокиров боздошт гардида, пас аз интиқол ба бинои раёсати мазкур ҳангоми бозпурсӣ ба ҳалокат расид. Ба эътиқоди хешовандону наздикони И.Бобоев, ӯ ба асари истифодаи шиканҷа ва методҳои ғайриқонунии бозпурсӣ фавтидааст. Ташхиси такрорӣ низ нишон дод, ки Бобоев дар натиҷаи ҷароҳат аз барқ ба ҳалокат расидааст.
