Дар робита ба бетартибиҳои оммавӣ дар Истанбул, ки ахири ҳафтаи гузашта шурӯъ шуданд, сиёсатмадор ва рӯҳонии шинохтаи тоҷик Ҳоҷӣ Акбар Тӯраҷонзода чунин ибрози андеша намуд, ки комёбиҳои дар замони ҳукмронии ба истилоҳ нерӯҳои исломӣ дар Туркия бадастомада, қобили қабули доираҳои сиёсии зиддисломии кишварҳои минтақа нестанд.
«Ҳизби адолат ва рушди нахуствазир Раҷаб Таййиб Эрдуғон шурӯъ аз соли 2002 ба дастовардҳои беназир дар рушди иқтисод ноил гардида, дар ин давра ҳаҷми ММД-и кишвар беш аз 6 маротиба афзуд ва бо ин ба тамоми ҷаҳониён собит гардид, ки аҳзоби исломӣ низ дар идораи кишвар муваффақ буда метавонанд ва дар ҷаҳон нерӯҳое пайдо шуданд, ки ин табъи дилашон нест», – иброз дошт Тӯраҷонзода.
Дар идома ӯ таъкид дошт, ки ба ҳар як сиёсатмадори солимфикр возеҳ аст, ки сабаби гирдиҳамоӣ дар Истамбул қарори тахриби як боғ дар шаҳр ва сохтмони маркази тиҷоратӣ дар ҷойи он аст, ки ба чунин тасмимгирӣ ҳукуматдорони Истанбул ҳам ваколатдоранд, вале эътирози мардум маҳз муқобили ҳукумати Эрдуғон сурат гирифт.
«Ба андешаам, дар бетартибиҳои оммавӣ қисман худи Ҳизби адолат ва рушд ҳам гунаҳкор буда метавонад, ки аз замони таъсиси он сарвараш Раҷаб Таййиб Эрдуғон аст. Таври маълум, дар ҳама гуна давлат аз салтанати дарозмуҳлат ва тағйирнопазири як шахс дар ниҳояти кор мардум дилсард мешаванд ва ин ҳам метавонад ба эътирозҳои ҳамагонии мардум боис гардад», – афзуд Тӯраҷонзода.
Тавре бахши тоҷикии сомонаи
радиои «Озодӣ»
хабар медиҳад, эътирози маъмулӣ бар зидди сохтмони фурӯшгоҳ дар ҷои як парки канори майдони Тақсими Истанбул ғайричашмдошт бо аксуламали шадиди полис мувоҷеҳ шуда, боиси тавсеаи эътироз дар бузургтарин шаҳрҳои Туркия гардид.
