Фахриддин Саидови барои содир намудани ҷиноёти гуногун мавриди ҷустуҷӯ қарордошта аз Русия ба Тоҷикистон истирдод шуд.
Бино ба иттилои ВАО-и Русия, Саидов дар Русия ҳудуди 6 сол бо шиносномаи қалбакӣ ба номи Маҳмадшариф Идиев иқомат дошта, дар Тоҷикистон барои содир намудани ҷиноёте чун роҳзанӣ бо истифода аз силоҳ, монеъа эҷод намудан дар адолати судӣ, ғайриқонунӣ аз озодӣ маҳрум кардан ва ғайра муттаҳам дониста мешавад.
Фахриддин Саидов 25-уми октябри соли гузашта дар фурудгоҳи «Колтсово»-и шаҳри Екатеринбурги Русия ҳангоми кӯшиши убури марзи давлатӣ бо шиносномаи қалбакӣ боздошт шуда, дар ҷараёни тафтишот ошкор шудааст, ки бо ин ҳуҷҷат ӯ ҳадди ақал ду маротиба марзро убур намудааст ва барои ин дар ҳаҷми 10 ҳазор рубли русӣ (ҳудуди 300 $) ҷаримабандӣ шудааст.
Гуфта мешавад, Фахриддин Саидов ҳамчун шахси наздики раиси Иттиҳоди тоҷикони вилояти Перми Русия Сайфиддин Одинаев муаррифӣ мешавад ва дар манзили ӯ низ расман ба қайд гирифта шудааст. Бо шиносномаи қалбакӣ дар вилояти Перм ӯ соҳиби амволи ғайриманқул будааст. Ҳамсараш – шаҳрванди Тоҷикистон ва кӯдаконаш дар Русия мондаанд.
Ғайр аз ин, замони ҷанги шаҳрвандӣ дар Тоҷикистон Саидов узви гурӯҳҳои мусаллаҳи ғайриқонунии Иттиҳоди нерӯҳои мухолифини тоҷик (ИНОТ) буда, мавриди афв қарор гирифтааст.
